۵ آیلیق موجادیله‌دن سونرا تورک اوشاق “سئوگی” کیملیک آلا بیلیب
بئش آی اؤنجه دونیایا گلن سئوگی آدلی تورک اوشاق آتا، آناسی‌نین بو مدت ایچینده وئردیگی موجادیله سونوجوندا بو تورک آد ایله کیملیک آلا بیلیب.
ایران‌داکی وطنداشلیق قئدیات ایداره‌لری‌نین تورکجه آدلارا قارشی چیخمالاری سونوجوندا سئوگی کیملیک الا بیلمیردی. آنجاق سئوگی‌نین آتاسی وحید پورمصطفائی و آناسی‌نین، وکیل عسگر محمدی ایله بیرلیکده وئردیکلری موجادیله ۵ آی سونرا موثبت سونوج وئریب.
ایرانین وطنداشلیق قئیدیاتی تشکیلاتی تصدیقلنمیش آدلاری‌نین لیستینی یاییملایاراق وطنداشلاردان بو آدلاری اوشاقلاری اوچون سئچمه‌لرینی ایسته‌ییر. والیدئینلر طرفیندن سئچیلن آد قئیدیات ایداره‌سی طرفیندن تکلیف اولونان لیستدن کناردا اولدوقدا، سئچیلمیش آد آراشدیریلماق اوچون بو تشکیلاتین (آد کومیته‌سی‌نین) ایداره هئیتینه گؤندریله‌جک و تصدیق ائدیلمه‌دیگی تقدیرده آدین سئچیلمه‌سینه ایجازه وئریلمه‌یه‌جک.
تصدیقلنمیش آدلار لیستینده سیاسی و دینی محدودیتلر و فیکیرلر، بیر چوخ وطنداشی اینسان حوقوقلارینا ضد اولاراق، اوشاقلارینا دینی، ائتنیک و یا مدنی کیملیکلرینه گؤره آد وئرمکدن محروم ائدیر.
والیدئینلر طرفیندن سئچیلن آدلارا کیملیک وئریلمه‌مه‌سی و قئیدیات ایداره‌سی‌نین قارشی چیخماسی ایلک حال دئییل. بوندان اؤنجه ۲۰۲۰-جی ایلده اردبیللی اوشاق “آییل” اوچون کیملیک وئریلمه‌مه‌سی و آییلین آتاسی‌نین شهر قئیدیات ایداره‌سی قارشیسیندا اعتراض ائتدیگی بیر ویدئونون یاییلماسی “آییل کامپانییاسی‌نین” باشلانقیج نؤقطه‌‌‌سی ایدی. بو کامپانییادا آییلین والیدئینلری‌نین بو اوشاق اوچون کیملیک آلامادیقلاری اعتراضینا علاوه، اوخشار بیر مانع یاشایان باشقا آذربایجانلی عائله‌‌‌لر ده یاشادیقلاری تجروبه‌لری سوسیال شبکه‌لرده درج ائتمه‌یه باشلادیلار. بونونلا یاناشی ایرانلی بلوچ، کورد و عرب عائله‌‌‌لری ده سوسیال مئدیادا پایلاشیم ائده‌رک اوشاقلاری اوچون کیملیک آلارکن قارشیلاشدیقلاری عینی مانع‌لری تنقید ائتمیشدیلر.
