۱۴ نفر هله ده طبس معد‌نینده قاپالی وضعيتده‌دیر
گونئی خوراسان والیسی “جواد قناعت” طبس کؤمور معدنی‌نین سی بلوکوندا ۲۲ نفرین ایشله‌دیگینی، اونلاردان سککیزی‌نین جسدی‌نین یوخاری کؤچورولدویونو، ۱۴ نفرین ایسه هله ده قاپالی وضعيتده اولدوغونو بیلدیریب.
او، آیریجا بی بلوکوندا ۴۷ ایشچی‌نین ایشله‌دیگینی، اونلاردان ۳۰ نفرین اؤلدویونو آچیقلاییب.
“دانشجو” خبر آژانسی‌نین یایدیغی بیلگیلره گؤره، گونئی خوراسان والیسی ۱۷ نفرین یارالاندیغینی، اونلاردان ۷ نفرین ائوه بوراخیلدیغینی، ۱۰ ایشچی‌نین ایسه خسته‌خانایا یئر‌لشدیریلدیگینی بیلدیریب.
تماشا در یوتیوب
او بیلدیریب کی، دونن د بلوکوندا تام قورتارما عملیاتی آپاریلیب.
آیریجا، داخیلی ایشلر ناظری “اسکندر مومنی” گونئی خوراسان بؤحران ایداره ائتمه قرارگاهی‌نین توپلانتیسیندا دئییب: “بیرینجی یولدان ۳۱ جسد چیخاریلیب، ایکینجی یولدا ایسه مین متره یاخین ایره‌لی چکیلیب، داها سونرا تونل گازلاری بوشالدیلمالیدیر”.
او، اعلان ائدیب: “ایشچیلرین ماسکی و سیار اکسیژنین اولوب-اولمادیغی یوخلانیلمالیدیر، یوخسا گازلاری چیخاران فنلر و گازین میقدارینی بللی ائدن سنسورلار دوزگون ایشله‌ییرمی؟ داواملی اولاراق نظارت ائتمه‌لی اولان قوروملارین اؤز گؤره‌ولرینی دوزگون یئرینه یئتیریب-یئتیرمه‌مه‌سی یوخلانیلمالیدیر ”.
مومنی قئید ائدیب کی، بو حادثه چوخ آجیدیر و هر بیر گوناهکار شخص باره‌سینده هر هانسی سويه‌‌ده ایسه قانونی تدبیر گؤرولمه‌لیدیر.
