یونس شاملی;قاراباغ موناقیشه‌سی سون قویولدو
آذربایجان اراضی‌سین‌ده ارمنیستان ایشقالینا قارشی ساواش سونا چاتدیریل‌دی. سون گونلرده شوشا شهرینین ایشقال‌دان آزاد ائدیلمه‌سی، ارمنیستان ایشقالینا قارشی چوخ جدی بیر دؤنوش نوکته‌سی اولدو و قاراباغ ساواشی تامامیله آذربایجان قلبه‌سی ایله سونا چاتماسی داها آیدینلاش‌دی. اما نویامبرین ۱۰ونا گئچه‌ن گئجئ بو گلیشمه‌نین قارشی‌سین آلمیش‌دیر و آذربایجان اوردوسونون جانلا قانلا الده ائد‌ن ظفری دایان‌دیرماق اوچون روس دئولتی طرفین‌دن بیر تشبوسله قارشی قارشییا دورموش‌دور. همه‌ن گئجه پوتین، آذربایجان طرفین آتشکس عادی آلتین‌دا بیر آنلاشمایا ایمضا آتماسی مجبوریتین‌ده قویموش‌دور و ساواشی سون آشامالارینا گلمیشکه‌ن و سون هافته‌سین گئچیریرکه‌ن، دایاندیرمیش‌دیر.
آتشکس آنلاشماسی پوتین`این تشبوسو ایله آذربایجان پرئزئدئنتی‌لیگی و ارمنیستان باش نازیرلیینه، یقین کی تزیقله، قبول ائتدیریلمیش‌دیر. آتشکس بیاناتینین یاییلان ساعتین‌دان آذربایجان ایجتیمایاتین‌دا شادلیق گؤزه چارپ‌سادا، سیاسی ساحه‌ده، بؤیوک بیر شاشقینلیغا ندن اولموش‌دور. روسییه آنلاشما ایمضالانان‌دان بیر نئچه ساعت سونرا روس اوردوسو آذربایجانا یوروتولموش‌دور. ائله بیر یوروتمه کی روس اوردوسو آذربایجانا گیرمک اوچون سینیرلارین آرخاسین‌دا گؤزلورموش کیمی گؤزه چارپ‌دی. و بو واسطه ایله قاراباغین ایکینجی و حقیقته‌ن ظفرلی ساواشی قویروغون‌دا موردار اولونموش بیر حادثه کیمی سون وئریل‌دی.
آذربایجان`دا شاشغین‌لیق آتشکس موقاویله‌سین‌ده قئید اولان بندلردن قایناقلانماق‌دادیر. باخ‌مییاراق کی بو موقاویله‌ده ارمنیستانین بزی رایونلاردان گئری اوتورماسی و یا نخجیوان بیر کوریدورون آچیلماسی نظره آلینمیش‌دیر، اما خان که‌ن‌دی، خوجاوه‌ند، خوجالی و آغ دره، ارمنیستانین نظارتی آلتین‌دا قالماسی روس طرفین‌دن قارانتی آلتینا آلینمیش‌دیر و آذربایجان سووره‌ن‌لیگی بو موقاویله‌ده اؤزونه زده‌له‌نمه فورماتی وئرمیش‌دیر.
البت‌ده کی ساواش سونو، و ۳۰ ایللیک ایشقال یاراسی آذربایجان وطنداشی اولان ارمه‌نیلرین گوونلیین قوروماق اوچون بیرلمیش میللتلر طرف‌سیز اؤلکه‌لردن بیر حربی گوجو قاراباغ بؤلگه‌سین‌ده بولونمالاری اؤن گؤرولمه‌لی ایدی. بو مقاما هر زامان آذربایجان طرفی وورقو یاپماق‌دا ایدی. اما آنسیزین آدی چکیله‌ن بو موقاویله‌نین ایمضالانماسی و آپار- توپار روس اوردوسونون آذربایجان ائرازی‌سینه یئرلشمه‌سین، گینه‌ده روس ائمپئریالیزمینین ۳۰ ایلده‌ن بری آذربایجان‌دان چکیلدیی اوردو بو اؤلکه‌یه گئری دؤنمک‌ده‌دیر. و بو گئری دؤنمه‌نین سونوجلاری البت‌ده کی آذربایجانا هر آلان‌دا، آغیر سونوجلاری اولاجاق‌دیر. آذربایجان رهبرلیگی بو حربی موداخیله‌نی، هر باهاسینا اولوردوی‌سا تورکییه`نی روس`لا برابر حقوق‌لو فورمادا آتشکس موقاویله‌سینه داخیل ائتمه‌لی ایدی.
ایمضا اولان آنلاشمادا، آذربایجانین ۴ شهری (خانکه‌ن‌دی، خوجاوند، خوجالی و آغ دره ) ارمنیستان کونتورولو و روس قوروماسین‌دا قالیر و بو شهرلر لاچین کوریدورو ایله ارمنیستانا باغ‌لانیر. بیر کوریدوردا آذربایجان`لا نخجیوان آراسین‌دا آچیلیر. اومورام کی بو ایکی کوریدور بیر ایشقال‌چی مقصدی ایفاده ایتمیرلر و بو م‌نادا کی ارمنیستان، آذربایجانا عایید نخجیوانا بیر کوریدور آچیرسا، آذربایجان`دا گویا ارمنیستانا عایید قاراباغا، لاچین کوریدورو آچمالی‌دیر، دئیه دوشونمه‌سینلر. سونوج بو کی، قاراباق ساواشی بلکه بیر یا ایکی هافته‌ده دوام ائتسهی‌دی، چوخ آز زیانلارلا، آذربایجانین قازانجی ایله سونا چاتاجاق ایدی. اما ایمضالانان آتشکس آنلاشماسی، بو سونوجون دوغولماسینا جدی بیر انگل تؤرت‌دی و قاراباغ ساواشینین بیر قازانانی یئرینه، اوچ قازانانی اولدو. آذربایجان ایشقال اولان توپ‌راقلارینین چوخون‌لوغونو گئری آلدی، ارمنیستان ایسه، قاراباغ‌دا ۴ شهرین کونترول آلتین‌دا ساخلادی و ان اؤن‌م‌لی‌سی، روس ائمپئریاسی اوردوسونو آذربایجان اراضی‌سینه گئری گتیردی و بو واسطه ایله آذربایجانین آزاد گلیشمه‌سینه تاریخی بیر انگل تؤرت‌دی.
ان سون و چوخ جدی بیر مقام دا آذربایجانین سووره‌ن‌لیگی، توپ‌راق بوتؤولویو، سوال و سورقو آلتین‌دادیر. اجبا روس کونتروون‌دا اولان شهرله آزئربایجانین سیاسی جوغرافییاسی حساب اولور یوخ‌سا یوخ؟ بو کیمی سواللار هله اؤز چؤزومون آتشکس آنلاشماسین‌دا بولمامیشدیرلار.
اما آتشکس آنلاشماسینا رغمه‌ن، آذربایجانین تورپاق بوتؤولویونو برپا ائتمک اوچون ایمکانلار سونا چاتمامیش‌دیر. یئنی آشامادا آذربایجان خالقی اوچون یئنی موجادیله یوللاری آچیلمالی‌دیر…
۲۰۲۰۱۱۱۱
