یوخاری نقدی کندینده سوگیرگینلیگی؛ کند قادینلاری مشگین‌شهر – اردبیل یولونو باغلادیلار
اردبیل ایالتی‌نین “یوخاری نقدی” (نوقدو) کندی‌نین ساکینلری دونن، ۲۰ خرداد ۱۴۰۰-جو ایل، جوما آخشامی، ایچمه‌لی سویون اولماماسینا اعتراض اولاراق مشگین‌شهردن اردبیله گئدن یولو نقدی کندی‌نین کسیشمه‌سینده باغلادیلار. یوخاری نقدی کندی‌نین ساکینلری سون بیر آیدا ایکینجی دفعه‌‌دیر کی، حاکیميتین کندین ایچمه‌لی سو پروبلئمینی حل ائتمک اوچون وئردیگی وعدلری یئرینه یئتیرمه‌مه‌سینه اعتراض اولاراق مشگین‌شهر-اردبیل یولونو باغلاییرلار.
وطنداش ژورنالیستلرین ایران‌وایره گؤندردیگی خبرلره گؤره، اعتراض میتینقی مشگین‌شهر فرمانداری اکبر صمدی‌نین ایشتیراکی و گوونلیک گوجلری‌نین موداخیله‌سیندن سونرا سونا چاتدی.
اکبر صمدی یوخاری نقدی کندی‌نین ساکینلرینه سؤز وئردی کی، بو کندین ایچمه‌لی سو پروبلئمی بیر آیا حل اولوناجاق. او کندلیلره دئدی: “تئزلیکله، کندین آشاغی حیصه‌‌‌سینده‌کی قویولارین سو انباری منبعیینه گئدن بورولار تمیزلنه‌جک و سو انباری‌نین ساغلاملاشدیریلماسی باشلاناجاق.”
یوخاری نقدی کندی اردبیل ایالتینده‌کی مشگین‌شهره باغلی کندلردن بیریدیر. ۱۳۹۵-جی ایل نوفوس ساییمینا گؤره، بو کندده ۷۳۸ نفر اهالی یاشاییر.
