یئنه مجبوری پئشمانلیق؛ بو دفعه زینب کاظم پور
تهران موهندیسلر بیرلیگی تشکیلاتی‌نین باشقانلیق هیئتی‌نین قادین آدایلاریندان بیری اولان زینب کاظم پور سس‌وئرمه زامانی موباحیثه‌لی اعتراضیندان بئش گون سونرا، بو گون، چارشنبه گونو، ۳ اسفند گونو خانیم کاظم پورون پئشمانلیق ویدئوسو اینترنتده یاییملانیب. او سس‌وئرمه زامانی اعتراضینی روحی تضییق آلتیندا اولدوغوندان قایناقلاندیغینی دئییر.
بو ویدئو، تهران ایالتی‌نین موهندیسلر بیرلیگی تشکیلاتی‌نین باشقانلیق هیئتی‌نین قادین آدایلاریندان اولان خانیم کاظم پورون گوونلیک گوجلری تضییقی ایله یاییملاندیغینی دئییلیر. او “حجابسیز” اولدوغونا گؤره آدایلیغینا ایجازه وئریلمه‌مه‌سینه اعتراض اولاراق باش اؤرتوسونو آتمیشدی.
بوندان سونرا اینقیلاب کئشیکچیلرینه یاخین تسنیم خبر آژانسی بو قادین موهندیسه قارشی حوقوقی پرونده‌نین آچیلدیغینی اعلان ائتدی.
تسنیم یازیب کی، خانیم کاظم پورا قارشی حجابین موقدسلیگینی تحقیر ائتمک ماده‌‌سی ایله محکمه پرونده‌سی آچیلیب و بونونلا باغلی “آراشدیرمالار” باشلاییب.
او، بو کورسوده مجبوری حجابی قالدیریب دئدی: آدایلارین حجاب تاخمادیغینا گؤره سئچکییه بوراخیلماسینا ایجازه وئرمه‌ین توپلانتینی حسابا قویمورام.
بو قادین موهندیسین باش اؤرتوسونو آتارکن قیسا سؤزلری و حرکتی سالونداکی تاماشاچیلارین سورکلی آلقیشلاری ایله یاناشی، سوسیال شبکه قوللانیجیلاری طرفیندن ده گئنیش رغبتله قارشیلانیب.
کئچمیشده ایسلام جمهورییتی‌نین گوونلیک اورقانلاری‌نین تأسف حیسینی ایفاده ائدن ویدئو یاییملاماق اوچون تضییق کئچمیشی اولوب. ائلناز رکابی ده ایراندا عومومی اعتراضلارلا عینی واختدا اولوسلارآراسی یاریشلاردا حجابسیز چیخان و جدی تضییقلره معروض قالان بئله حاللاردان بیریدیر. داها سونرا او، بیر ویدئودا حجابی‌نین “تصادوفاً” باشیندان دوشدویونو بیلدیریب.
