گلیک گنج لنگرود پولیس مرکزینده ایشگنجه‌لره معروض قالاراق حیاتینی ایتیریب
لاهیجان‌دان اولان یئرلی قایناقلارین وئردیگی بیلگیلره گؤره، “سید محمد میرموسوی” آدلی گیلک گنج “ چئویک قوه‌لر طرفیندن حبس ائدیلدیکدن سونرا لنگرود پولیس مرکزینده ایشگنجه و شدتلی دؤیولمه سونوجوندا دونیاسینی ديیشیب.
یئرلی قایناقلارین وئردیگی بیلگیلره گؤره، بو حادثه شنبه گونو، ۳ شهریورده باش وئریب و محمدین جانسیز جسدی عائله‌‌‌سینه تحویل وئریلیب. جناب میرموسوی‌نین جسدی‌نین سوسیال شبکه‌لرده یاییملانان ویدئوسونا گؤره، اونون بدنینده آغیر ایشگنجه‌لرین تأثیری آچیق-آشکار گؤرونور. ایران‌وایر بو شکیللرین اجیناجاقلی اولدوغونا گؤره یئنیدن یایماقدان عوذرلودور.
جناب میرموسوی لاهیجان شهری‌نین رودبنه ماهالی‌نین “سیدمحله” کندیندن ایدی. بو حادثه‌‌‌دن سونرا گوونلیک اورقانلاری بو گنج گیلکین عائله‌‌‌سینه تضییق ائده‌رک اونلارا بو حادثه ایله باغلی بیلگی وئرمیی قاداغان ائدیب. قایناقلارین وئردیگی بیلگیلره گؤره، لنگرود شهر ساوجیلیغی عائله‌‌‌نی هدهله‌مکله اونلاری هر هانسی آچیقلامایا قارشی خبردارلیق ائدیب و بئله بیر حرکته یول وئررسه، جینایت پرونده‌سی آچیلاراق حبس اولونا بیله‌جکلری باره‌ده خبردارلیق ائدیب.
بو خبرین درجیندن سونرا لاهیجان ساوجیسی “ابراهیم انصاری” بیلدیریب کی، بو شهرده پولیس قوه‌لری‌نین نظارتینده اولان بیر وطنداشین اؤلوموندن سونرا ۵ پولیس امکداشی‌نین مووقتی ساخلانماسی و محکمه ایستینطاقی قراری وئریلیب و آراشدیرما داوام ائدیر.
