کیرمان پارتلاییشلاریندا اؤلنلرین سایی‌نین چئلیشگی‌سی؛ داخیلی ایشلر ناظری اؤلنلرین سایی‌نین ۸۴ اولدوغونو آچیقلاییب
ابراهیم رئیسی حؤکومتی‌نین داخیلی ایشلر ناظری احمد وحیدی بیلدیریب کی، عدلی طبین آچیقلادیغی ایستاتیستیکایا اساساً، کیرمانداکی پارتلاییشلاردا اؤلنلرین سایی ۸۴ نفردیر. ساغلیق ناظری ده بو سایی‌نین ۹۵ نفر اولدوغونو آچیقلاییب.
کیرمان فرمانداری‌نین سؤزلرینه گؤره، ایندییه‌دک اؤلنلرین یوزده ۷۰-نین کیملیگی بللی ائدیلیب.
ایسلام جمهورییتی عدليه‌‌سی‌نین خبر آژانسی میزان بو حادثه‌‌‌ده یارالانان ۲۸۴ نفرین آدلارینی یاییب.
بوندان اؤنجه، قاسم سلیمانی‌نین کیرمانداکی مزارلیغی یاخینلیغیندا باش وئرن ایکی پارتلاییشدان سونرا بو پارتلاییشلاردا اؤلنلرین سایی‌نین ۱۰۳ اولدوغو آچیقلانمیشدی.
بوندان سونرا ساغلیق ناظری بهرام عین‌اللهی بیلدیریب کی، اؤلنلرین سایی ۹۵ نفردیر.
او اعلان ائتدی: سایی‌نین چوخ آچیقلانماسی‌نین اساس سببی بعضی آدلارین ایکی دفعه سهواً قئیده آلینماسی اولوب.
او، آیریجا یارالیلارین سایینی ۲۱۱ نفر اولاراق آچیقلاییب.
ساغلیق ناظری‌نین آچیقلادیغی ۹۵ اؤلومون نئجه ۸۴ نفره دوشدویو بللی دئییل.
