ژورنالیست الناز محمدی گیروو قارشیلیغیندا سربست بوراخیلیب
هم‌میهن قزئتی‌نین سوسیال قروپونون باش یازاری، ژورنالیست الناز محمدی اوین حبس‌خاناسیندان گیروو قارشیلیغیندا سربست بوراخیلیب.
هم‌میهن قزئتی‌نین توییتر صفحه‌‌‌سی خانیم محمدی‌نین شکلینی درج ائتمکله بو ژورنالیستین آزادلیغینی تصدیقله‌ییب.
الناز محمدی‌نین باجیسی الهه محمدی هله ده حبسده اولان باشقا بیر ژورنالیستیدیر.
الهه محمدی شرق قزئتی‌نین موخبیری نیلوفر حامدی ایله بیرلیکده ایراندا مهسا امینی‌نین اخلاق پولیسی نظارتینده اؤلمه‌سی خبرینی و آیریجا اونون سقزده‌کی دفن مراسیمی خبرینی یایدیقدان سونرا حبس ائدیلن ایلک ژورنالیستلردن بیری اولوب و اونلار هله ده حبسده‌دیرلر.
اؤتن آیلاردا عومومی اعتراضلاردان سونرا ایراندا چوخو قادین ژورنالیست اولان چوخلو ژورنالیست حبس ائدیلیب.
دونیادا حبسده اولان قادین ژورنالیستلرین تخمیناً دؤردده بیری ایراندا حبسده‌دیر.
سرحدسیز ژورنالیستلرین ۲۰۲۲-جی ایل راپورونا گؤره، دونیا اوزره حبسده اولان توپلام ۷۸ قادین ژورنالیستدن ۱۸ نفری ایران ایسلام جمهورییتی طرفیندن حبسده‌دیر. بو راپورا گؤره، چیندن سونرا ایران یالنیز بیر محبوس فرقی ایله دونیانین قادین ژورنالیستلر اوچون ان بؤیوک حبس‌خاناسیدیر.
