وحید اشتری‌نین حؤکمو ایجرا ائدیلیب؛ سیسمونی‌گیتی ایفشا ائدن شخص حبس‌خانایا گؤندریلدی
عدليه‌‌یه باغلی اولان میزان خبر آژانسی‌نین مودیری‌نین وئردیگی آچیقلامایا گؤره، سیسمونی گیت ایفشاچی‌سی موحافیظه‌کار مئدیا فعالی “وحید اشتری” حبس‌خانایا گؤندریلیب.
میزان خبر آژانسی‌نین مودیری مهدی کشت‌دار، ۳۱ خرداد گونو بیر تویتینده یازیب: “وحید اشتری‌نین پرونده‌لریندن بیری اوزره حؤکم چیخاریلیب و او، حبس‌خانایا گؤندریلیب”.
داها اؤنجه ۳۰ تیر ۱۴۰۱-ده قالیبافین عائله عضولری‌نین تورکیه‌یه سفرینی ایلک دفعه ایفشا ائدن موحافیظه‌کار مئدیا فعاللاریندان بیری اولان وحید اشتری‌نین ایکی ایل حبس جزاسینا محکوم ائدیلدیگینی و مئدیا فعالیتینه قاداغا قویولدوغونو آچیقلامیشدی.
ایکی ایلدن سونرا اشتری‌نین حبس جزاسی‌نین ایجراسی، “محمد باقر قالیباف”ین قیزی “مریم قالیباف”ین تلویزیون پروقرامیندا “سیسمونی گیت” حادثه‌‌‌سینی آتاسینا قارشی بیر ایش اولدوغونو و یالان آدلاندیردیغی واختا تصادوف ائدیر و بوندان سونرا وحید اشتری چارشنبه گونو جاوابدا قالیباف عائله‌‌‌سی‌نین تورکیه سفریندن قاییدارکن یوکونون شکلینی درج ائدیب.
اشتری‌نین ایفشاسیندان سونرا معراج هاوا یوللاری شرکتی قالیباف عائله‌‌‌سی‌نین یوکلری‌نین شکیللرینی یاییملادی و اشتری‌نین ایفاده‌لرینی یالان آدلاندیردی و سندلرین ساختا اولدوغونو و محکمه یولو ایله آراشدیراجاغینی آچیقلادی.
