ناموس جینایتی: اورمیه‌ده گنج بیر قادین آتاسی و قارداشی طرفیندن یاندیریلدی
اینسان حاقلاری تشکیلاتلاری، باتی آذربایجان ایالتی‌نین اورمیه شهرینده “عشرت نیکخویی” آدلی بیر قادینین اؤلدورولمه‌سی باره‌ده بیلگی وئره‌رک بو قادینین “ناموس” مسئله‌‌لری سببی ایله اؤلدورولدویونو سؤیله‌دی.
هنگاو اینسان حوقوقلاری تشکیلاتی، ۱۸ بهمن ۱۳۹۹-جو ایل شنبه گونو عشرت نیکخویی‌نین کئچن هفته چارشنبه گونو قارداشی و آتاسی طرفیندن اؤلدورولدویونو بیلدیردی.
بو شبکه بیلگیلی بیر قایناغا دایاناراق عشرت نیکخویی‌نین قارداشی و آتاسی‌نین اؤنجه اونو اؤلدوردویونو، سونرا جسدینی یاندیردیغینی بیلدیردی.
بو قایناغا گؤره عشرت ائولی و ۳ اوشاق آناسی ایدی و بیر مدت اؤنجه حیات یولداشیندان آیریلاراق آتاسی‌نین ائوینه قاییتمیشدی.
بو قادینین یانمیش جسدی حاضردا اورمیه‌ده عدلی طبّده ساخلانیلیر.
عشرت نیکخویی‌نین قتلی باتی آذربایجان ایالتینده سون ایکی آیدا باش وئرن اوچونجو بئله قتلدیر.
۴ بهمن ۱۳۹۹ شنبه گونو سونیا دهقان آدلی بیر قادین سردشت‌ده قارداشی و عمیسی اوغلو طرفیندن “ناموس” مسئله‌‌سی بهانه‌سی ایله اؤلدورولدو.
آذر آییندا ایسه وفا عبدالله‌زاده آدلی ۴۳ یاشلی بیر قادین سردشت‌ده قارداشی و قارداشی اوغلو طرفیندن “ناموس” مسئله‌‌سی سببی ایله اؤلدورولدو.
