مهندس رحیم عباسی : اورمو گؤلۆنۆن چؤزۆم یوْلو (اوْرتاق دیل)
بو گؤنلر هامی اورمو گؤلۆنۆن جان وئرمه سین گؤرۆر. کئچن ایله گؤره سویون سَوییه‌سی قیرخ آلتی سانتیمئتیر آزالیب، آنجاق چوْخ آزیمیز اونا یاناشیب یازی یازیریق، دیله گتیریریک.
منجه میللتچیلردن باشقا گؤلۆن قایغیسینا قالان یوْخدور. بلکه ده باهالیق، یاشام خرجلری چوْخوموزو کیریخدیریبدیر. آمما دوزون توْزو هامیمیزا بیرگه ایز بوراخاجاقدیر.
هامینین بیرگه گؤزلری آجییاجاقدی. هامینین بیرگه اؤپگه لری داغیلاجاقدی. اکینلر یاخین اوزاقلیغا باغلی بیرگه قورویاجاقلار.
ساده جه هامینی بیرگه قاچاق سالاجاق. هامی زیان گؤره جکدیر.
اوْرتادا وارلی‌لار یوْخسوللاردان چوْخ زیان گؤره جکلر.
«بیر حصیر، بیر ده ممد نصیر»ین، نه یی واردی؟ بیر اؤزۆ بیرده حصیری! آمما وارلی، نه قدر یاتیریمی جئبینده ویا بانک‌دا اوْلورسا، یۆز قاتی یئرله کرخانا آوادانلیغیندادیر. هر حالدا هامی بیرگه زیان گؤره جکدیر. بس نییه یالنیز میللتچیلر قایغی چکیرلر؟
بو اوْنو گؤستریر کی، میللتچیلر توْپلومون دۆشۆنن بئینی و دؤیۆنن اۆره‌گی دیرلر. البتده بو اوْنلاری بؤیۆتمک دگیل، بلکه اوْنلارین دوْغال گؤرَولری دیر.
ایندی گؤرک گؤل نییه بو گۆنه قالدی؟ نه‌دنلردن چوْخ یازیرلار. ائکولوژی دگیشمه سی، گؤلۆن هنده ورینده اکینچی لیکله باغچیلیغین چوْخالماسی، گؤلۆن اوْرتاسین زنبیل داغین قازیب – دوْلدورماسی، نه بیلیم گؤلۆن دیبینده قاینایان زینه لرین گؤزلری توتولماسی، اوْتوز ایکی یوخسا اوْتوز اۆچ سو بندی گؤله آخان چایلارین اۆستۆنده وورولماسی و گیزلی قاچاق قویولارین قازیلماسی.
منجه بونلارین هامیسی دۆز اوْلاراق بیر نه‌دن کی یئرلی-کؤکلۆ نه‌دن‌دیر؛ کیمسه نین یادینا دۆشمۆر. اوْدا دیلدیر، اوْرتاق دیل،
بیز، بیر – بیریمیزین دیلین باشا دۆشمۆرۆک؛ بلکه دۆشه بیلمیریک.
بیزیم میللتیمیز اؤز دیلیمیزده ساوادسیزدیرلار. یالنیز ائشیدیب، دانیشیریق. اؤزۆده نه تهر ائشیتمیشیک او سایاقدا دانیشیریق. هر کیم ائشیتدیگی سایاقدا.
بس اوْرتاق دیل یوْخدور. بو بیر یاندان. باشقا یاندان حاکمییت دیلی ده، بیزلره اؤزگه دیر. هئچ اوْرتالیق یوْخدور.
اوْخولا، بیلیم یوردا گئدنلر سینیق-سالخاق اؤگرنیب، او سایاقدا ایلگی باغلاییرلار.
بیلگینلریمیز یاخشی بیلیرلر کی بو دئدیگیم سؤزلر تاپماجا دگیرلر.
یۆز ایللر ایچینده دوْغال اوْلایدی.
بیز بۆتۆن ایستکلریمیزله یاناشی بو ان اؤنملی ایستگیمیزی ده، باشدا اوْلاراق ایستمه لی‌ییک.
مهندس رحیم عباسی
