محمود‌آباددا قاریشیق قوناقلیق کئچیرن ۳۰ نفر حبس ائدیلیب
ایراندا قاریشیق قوناقلیقلارا قارشی گوونلیک اؤنلملری‌‌نین آردیندان محمودآباد عومومی و اینقیلاب ساوجیسی مازنداران ایالتینده ۳۰ نفرین حبس اولوندوغونو و “قاریشیق قوناقلیق کئچیرمک و ایچکی سرویسی” نه‌دنی ایله اونلارا قارشی اتهام ایره‌لی سورولدویونو بیلدیریب.
قاسم نبی‌زاده بازار گونو، ۲۶ دی-ده مهر خبر آژانسینا موصاحیبه‌سینده ادعا ائدیب کی، محمودآباد ساوجیلیغی محمودآبادین امیر سالار شهرکینده حووضلو دبدبه‌‌لی ویلالارین کیرایه‌‌‌سی ایله باغلی اهالیدن چوخ‌سایلی بیلگی و شیکایتلر آلینیب.
او، داوام ائتدی: محکمه‌‌نین قراری ایله ایالتین ایکی عملیات قروپو اؤزل عملیات کئچیره‌رک بو ویلالارین بیرینه گیره‌رک ۳۰ نفری حبس ائدیب.
محمودآباد ساوجیسی ادعا ائدیب: چوخ اویغونسوز دورومدا قاریشیق قوناقلیق کئچیرن و ایچکی سرویس ائدن بو شخصلرین بیر نئچه‌سی محکمه‌‌نین قراری ایله حبس ائدیلیب.
نبی‌زاده بیلدیریب کی، ویلانین مؤهورلنمه‌سی باره‌ده امر وئریلیب.
قیز و اوغلانلارین، اساساً عائله‌‌‌نین، دوستلارین و تانیشلارین قاتیلیمی ایله قوناقلیق کئچیریلمه‌سی ایراندا عادی حالدیر؛ آنجاق دین خادیملری، پولیس و گوونلیک اورقانلاری بونو سوچ حساب ائدیر و خبر آلان کیمی قوناقلیغا قاتیلانلاری حبس ائدیرلر.
