قئیدارین زرن آوا ماغاراسی ملی طبیعی ارث سیاهیسیندا قئیده آلینیب
چینار – زنگان‌ین مدنی ارث، توریزم و ال ایشلری باش مدیری دئییب: قئیدارین زرن آوا ماغاراسی زنگان استانی‌نین ۸۹۲-جی آبیده‌سی اولاراق ملی طبیعی ارث سیاهیسیندا قئیده آلینیب.
چینارین جمعه گونونون معلوماتینا گؤره، امیر ارجمند بونونلا باغلی علاوه ائدیب: ۱۳۰۹-جو ایلین آبان آییندا تصدیق ائدیلمیش آبیده‌لرین محافظه‌سی حاقیندا قانون و اونون اساسنامه‌لرینی حیاتا کئچیرمک اوچون زرن آوا ماغاراسی‌نین قئیدیات فایلی حاضیرلاناراق، ناظیرلییین قئیدیات، قوروما و برپا اداره‌سینه گؤندریلیب. سون تصدیق اوچون معنوی و طبیعی ارث اوزره ملی طبیعت ارث سیاهیسینا داخیل ائدیلیب‌دیر.
او آرتیردی: زرن آوا ماغاراسی قئیدار شهرستانی‌نین زرن آوا شهری یاخینلیغیندا یئرله‌شن زنگان استانی‌نین ان گؤزل ماغارالاریندان بیریدیر.
استانین مدنی ایرث اداره‌سی‌نین باش مدیرینین سؤزلرینه گؤره، مختلف دهلیز و دالان‌لاری، چوخلو دولاقلاری، سیلدیریم یاماجلاری و دار جیغیرلاری اولان بو ماغارا قورو و سولو ماغارالاردان بیریدیر و بعضی یئرلرینی قاییق‌سیز گزمک مومکون دئییل.
ارجمند علاوه ائدیب: بو طبیعت آبیده‌سی‌نین ملی ارث سیاهیسیندا قئیده آلینماسی ایله زنگان استانی‌نین قئیده آلینمیش مدنيت، تاریخ و طبیعت آبیده‌لرینین سایی ۸۹۲-یه چاتیب.
چینارین وئردییی معلوماتا گؤره، زنگان‌دان همدانا گئدن یولدا زرن آوا شهریندن ۱۰ کیلومتر آرالیدا، زرن آوا ماغاراسی‌نین کسه یولو وار. ماغارا ۱۳۸۴-جو ایلده باش وئرن زلزله زامانی یئرلی ساکین‌لر طرفیندن آشکار ائدیلیب،۱۳۸۵-جی ایلده ایسه اوروپالی بیر ماغاراچی قروپ طرفیندن خریطه‌سی چکیلیب.
ماغارانین گیریشی دنیز سويه‌‌سیندن ۱۸۵۰ متر یوکسکلیک‌ده یئرله‌شیر. زرن آوا ماغاراسی چوخ مرتبه‌‌لی ماغارادیر و بو گونه قدر یالنیز ۲ مرتبه‌سی آشکار ائدیلمیشدیر. ماغارانین مختلف حیصه‌لرینده مختلف یوکسکلیک‌لر وار.
