صیاد محمدیان اوچ گونلوک مرخصی‌سی بیتدیکدن سونرا کچویی حبس‌خاناسینا قاییتدی
کرج‌ده یاشایان تورک مدنی فعال (اووچو) صیاد محمدیان اوچ گونلوک مرخصی‌سی بیتدیکدن سونرا کچویی حبس‌خاناسینا گئری قاییدیب.
۲۴ دی ۱۴۰۳-ده اوچ گونلوک مرخصی‌یه گؤندریلن جناب محمدیان ۶ آیلیق حبس مدتی‌نین اوچده بیرینی ساویب.
صیاد (اووچو) محمدیان ۵ آذر گونو سحر ساعتلاریندا کرج‌ده‌کی ائوینده محکمه قراری اولمادان و کوبود رفتارلا حبس ائدیلیب و گوونلیک گوجلری جناب محمدیانی ۶ آیلیق جبس جزاسینی چکمک اوچون کرج‌ده‌کی کچویی حبس‌خاناسینا کؤچوروبلر.
بو تورک فعالین جزاسی‌نین اوچده بیرینی چکمه‌سینه باخمایاراق دفعهلرله مرخصی ایستگی رد ائدیلمیشدی.
بو تورک سیاسی محبوسون دا باشقا سیاسی محبوسلار کیمی عدالتسیز شکیلده قاپالی محکمه سورجینده حبس جزاسی آلماسی بیر یانا، حتی باشقا محبوسلارا وئریلن ایمتیازلاردان بئله محروم ائدیلیر.
اووچو محمدیان قوشاچای (میاندواب) اصیللی و کرج (یئنگی ایمام) شهری‌نین ساکینیدیر. بوندان اؤنجه ده او، سیویل فعالیتینه و ایران‌دا تورکلره قارشی دیل و مدنی آیری-سئچکیلییه اعتراض ائتدیگینه گؤره دفعهلرله گوونلیک گوجلری طرفیندن تضییق و تهدیدلره معروض قالیب.
بو مدنی فعال ۲۶ خرداد ۱۴۰۳ شنبه گونو ۷۰۰ میلیون تومن گیروو قارشیلیغیندا کرج مرکزی حبس‌خاناسیندان محکمه‌یه قدر مووقتی اولاراق سربست بوراخیلمیشدی.
آرتیرمالییق کی، سون بیر ایلده توتلان بعضی تورک مدنی فعاللار بلیرسیز و ساختا اتهاملار ایله اطلاعات مامورلاری طرفیندن توتولاراق تهرانین اوین حبس‌خاناسیندا شرطی آزادلیقدان محروم قالاراق ساخلانیلیرلار.
