سیما علیپور تبریز اطلاعات ایداره‌سینه چاغیریلیب
تورک مدنی فعال سیما علیپور، ۵ شهریور ۱۴۰۲–جی ایلده تلفون دانیشیقلاری زامانی تبریز شهر اطلاعات ایداره‌سینه چاغیریلیب.
یاخینلاری‌نین دئدیگینه گؤره، بو فعال گوونلیک گوجلری طرفیندن حبس اولونماقلا هده‌له‌نیب.
سیما علیپور ۷ خرداد گونو گوونلیک گوجلری طرفیندن حبس ائدیلمیش و ۱۰۰ میلیون تومنلیک گیروو اؤدندیکدن سونرا ۱۶ خرداد گونو تبریز مرکزی حبس‌خاناسیندان سربست بوراخیلمیشدیر.
اورمیه گؤلونون دورومو کریتیکلشدیکجه فعاللارا قارشی چاغیریش، تهدید و حبس دالغاسی دا آرتیب.
سون گونلر خالق قروپلاری، چئوره فعاللاری و آذربایجان مدنی فعاللار اورمیه گؤلونون قوروماسی‌نین سونوجلاری باره‌ده بیلگیلندیرمه‌یه چالیشاراق، گؤلون جانلانماسی اوچون حاکیميت اورقانلارینا خبردارلیق ائدیبلر.
چئوره ساحه‌‌‌سینده اوزمانلارین فیکرینجه، اورمیه گؤلونون قوروماسی بو اراضی‌نین ۱۴ میلیوندان چوخ ساکینی‌نین حیاتینی تهلوکه آلتینا قویوب و بو اراضی ساکینلری‌نین مجبوری کؤچونه سبب اولاجاق.
اکولوژی اوزمانلارین فیکرینجه، اورمیه گؤلو اطرافیندا توز و آکتیو دوز فیرتینالاری ۵۰۰ کیلومتره قدر مسافه‌‌نی قت ائده بیلر.
