سلماسین قارا قشلاق کندی اهالیسی‌نین دینج اعتراضی گوونلیک گوجلری طرفیندن شدته چئوریلیب
باتی آذربایجانین سلماس شهری‌نین قارا قشلاق کندی‌نین اهالیسی تورپاقلاریندا دوز فابریکی‌نین یارادیلماسینا اعتراض علامتی اولاراق دینج اعتراض توپلانتیسینا گوونلیک گوجلری هوجوم ائدیب و اعتراضچیلاری دؤیه‌رک داغیدیبلار.
حادثه شاهیدلری بیر نئچه کند ساکینی‌نین حبس اولوندوغونو بیلدیریبلر، آنجاق دقیق ایستاتیستیک بیلگی اولمادیغیندان توتولانلارین سایی و آدلاری بللی دئییل.
قارا قشلاق کندی‌نین ساکینلری بو کندین تورپاقلاریندا فابریکین یارادیلماسینا گؤره، اعتراض آکسییاسی کئچیره‌رک حؤکومتدن و ایلگیلی قوروملاردان بو مسئله‌‌یه باخیلماسینی طلب ائدیبلر.
بو کندین تورپاقلاریندا دوز فابریکی‌نین یارادیلماسینا اهالی‌نین اعتراضی‌نین اساس سببی کند اکینچیلیک تورپاقلاری‌نین اکینه یارارسیز حالا دوشمه احتیمالی‌نین یوکسک اولماسی و اوتلاق ساحه‌‌‌لری‌نین، باغلارین داغیدیلماسی و چئوره‌یه سیزماسی سونوجونداکی ضرردیر.
بوندان اؤنجه کاوه سودا فابریکی‌نین فعالیتی سونوجوندا بناب و ماراغا کندلرینده یوزلرله هکتار کند اکین یئری‌نین یارارسیز حالا دوشدویو باره‌ده بیلگیلر یاییلمیشدی.
کاوه سودا شرکتی ماراغانین موسی دره‌سی بؤلگه‌سینده یئرلشیر، بورادا تمیزلییجی قورغونون چرکاب سولاری و صنایع آتیقلاری صوفی چایی واسطه‌‌‌سیله بناب کندلرینه آخیر و یئرآلتی سولارین، اوتلاقلارین و کند اکین تورپاقلاری‌نین چرکلنمه‌سینه سبب اولور و چئوره فلاکتینه سبب اولا بیلر.
