سلاحلی شخصلرین زاهیدان‌دا قلعه بید حربی مرکزینه سالدیریسی سونوجوندا بیر نفر اؤلوب
سیستان و بلوچیستان‌دان اولان یئرلی قایناقلارین وئردیگی بیلگیلره گؤره ۲۶ مرداد ۱۴۰۳-جو ایل سحر ساعتلاریندا سلاحلی شخصلرین زاهیدان‌دا قلعه بید حربی مرکزینه سالدیریسی سونوجوندا بیر عسگر (سرباز وظیفه) اؤلوب.
بو خبره گؤره، نیشابور شهریندن اولان بو عسگرین آدی علی رئوفیان‌دیر و سلاحلی شخصلر طرفیندن اؤلدورولوب.
چاتیشمادان سونرا سلاحلی شخصلرین حادثه یئریندن قاچدیغی و پولیسین اونلاری آختاردیغی بیلدیریلیر. بو گون سحر ساعتلاریندا یئرلی مئدیادا بو آتیشمانین ویدئوسو یاییملانیب. هله‌لیک هئچ بیر قروپ بو هوجوما گؤره مسوولیتی اوزرینه گؤتورمه‌ییب.
اؤتن آیلاردا حؤکومتین حربی قوه‌لری ایله سلاحلی اینسانلار آراسیندا قارشیدورما باره‌ده چوخلو خبرلر درج اولونوب. ۲۹ تیر ۱۴۰۳-جو ایلده بلیرسیز سلاحلی شخصلر سراوانین سبحان شهرینده حربی قوه‌لرین “تویوتا هایلوکس” مارکالی اتومبیلینه آتش آچمیش، بیر نفری اؤلدورموش، دؤرد نفری یارالامیشلار.
سیستان و بلوچیستاندا بو سلاحلی عملیاتلاری حیاتا کئچیرن قروپلاردان بیری ده اؤتن آیلاردا پولیس قوه‌لرینه و اینقیلاب کئشیکچیلرینه اؤلومجول ضربه‌‌‌لر ائندیرمیش “جیش‌العدل” قروپلاشماسیدیر.
