رضوی خوراساندا اعتراض چاغیریشلاری اوچ قات آرتیب
رضوی خوراسان پولیس قوه‌لری‌نین کوماندیری محمد کاظم تقوی ایالتده اعتراض چاغیریشلاری‌نین اؤتن ایلدن بری اوچ قات آرتدیغینی آچیقلادی.
تقوی، «اقتصادی چتینلیک و کرونا خسته‌لیگی»نی تهلوکه‌‌‌سیزلیک و اعتراضلارین آرتماسینداکی ایکی عامل اولاراق قئید ائدیر.
او بو چاغریشلارین، رژیمین دوشمنلری طرفیندن وئریلدیگینی و بو ندنله اعتراض چاغیریشلاری‌نین هامیسی‌نین «قانونسوز اولدوغونو» ادعا ائتدی
بو مقام علاوه ائدیب کی، رضوی خوراسان پولیسی‌نین اعتراض چاغیریشلارینی ایداره ائتمه باره‌ده کئچمیشی «پارلاقدیر».
آرتان اقتصادی و دولانیشیق پروبلئملری ایرانین موختلیف شهرلرینده اعتراض میتینقلری‌نین سایی‌نین آرتماسینا سبب اولوب.
پولیس و تهلوکه‌‌‌سیزلیک قوه‌لری گنللیکله بو توپلانتیلارا قارشی زوراکیلیق تطبیق ائدیرلر.
