دینسیز دیندارلار!.. ایرانین شیعه فیریلداقچیلیغی
حسن ارک: دینسیزلر، دین آدیلا قوزئی آزربایجان سفیرلیگینین عمارتینه سالدیرار کن، سفیرلیگین دیوارلارینا یاحسین شعاری یازدیلار… عجب کی یاحسین شعارین عرب الفباسیله یازدیلار!
چوخ زاماندی دینسیزلر، دین اؤرتویونون آراخاسیندا گیزله نرکن، اوزگه لرین نوکرچیلیگی‌ایله مشغولدولار.
بیر مملکتین بیر اؤلکه نین بیر مستقیل دولتین، سیتی زنی (وطنداشی) و یا خود شهروندی اولاسان، اوزونو او مملکتین صاحیبی و دولت منتقدی کیمی تانیتدیراسان، سونرادا داشینی دؤشونه ویردیغین مملکتین، یابانجی و اؤزگه بیر کشورده، سفیرلیگینه یعنی بین الملل پرستیژینه، سالدیراسان و رسمی بایراغی سفیرلیگین دروازه سیندن ائندیریب یئره آتیب آیاقلار آلتینا سالاسان، سونرادا اؤزونو وطن سئور و دین سئور بیری کیمی تانیتدیراسان، والله بیر یئنی نوبارلیقدی!!!
بئله بیر رفتار صاحیبی، هانسی دوشونجه ده اولورسا اولسون؛ هم، وطنسیزدی، هم ده دینسیزدی. بیر مملکتین بایراغی اونون میللی سیمگه‌سی دی. اولماز کی سن اؤزونو وطن سئور تانیتدیراسان، اؤزونو وطن اوغروندا مباریز کیمی تانیتدیراسان، سونرادا همان وطنینین میللی بایراغینا بو سایاق حؤرمتسیزلیک ائله‌ییب، غرور دویاسان!. بو ایشین تکجه بیر معناسی وار، سن وطنسیزسن. سن وطن خائینی سن. اوسته لیک بو ساتقینلیغی دین آدیلا ائله‌ییر سن، یعنی سن هم ده دینسیزسن. نییه کی، بو ایشین له هم وطنه خیانت ائدیرسن، هم ده دینه. دیندن نسنه کیمی سوءاستفاده ائتمک، دینی معنوی دَگرلریندن سالماق دئمکدیر. پس سن بیر دین خائینی سن.
منجه اولار کی بو رفتارلاری گؤستریرلر، نه دینی باشا دوشوبلر نه وطنی. نه وطن سئورلیکده صادیقدیلر نه دین سئورلیکده.
دینی ادبیاتدا بیر سوز وار: «الله توزاق قورانلارین توزاقلارین اؤز باشلارینا ییخار». لندن‌ده اوز وئرن فاجعه دقیقا بو سؤزون مصداقی دیر. بو فاجعه بیر سیرا دینسیز دینچیلرین گئرچک اوزلرین دونیایا سرگیله‌دی. البته کی بونلار آزربایجانلی ساییلا بیلمزلر.
تانرییا مین شوکور. ۱۴۰۱/۵/۱۴
