دکتر سیمین صبری : قادینلارا قارشی کیلیشه لر و آشاغیلامالارایله سوسیال مئدیادا تانیش اولاق
طنز ندیر و تمسخر ندیر؟ تعریف لری و هدف لری.
طنز: متناسب گؤرسنن اما غیری متناسب رابیطه‌لری و حادیثه لری، ایجتیماعی پدیده لرده اوزه چیخاردیر و تکجه گولدورمک مقصدی ایله یوخ، دوشوندورمک مقصدی ایله ده اله آلینیر.
تمسخر و یا تحقیر: شخصلر و یا اینسان قورپلاری هدف آلینیر، بورادا مقصد دوشوندورمک و یا دئییشدیرمک دئییل. بیر باشا هدف تخریب، آرادان آپارماق و یاخود همان شخص و یا قوروپو حاشیه ی ایتمک‌دیر.
قادینلاری تحقیر ائدن ویدئولاردا، البته آنا رول یا باش رول دا همکارلیق ائدن قادین لارا وئریلیر. بورادا هم بو حیله نی یایماق ایسته ییرلرکی گویا بورادا بیر خانم شخصاً باش رول دا و اصلا قادینلارا تحقیر مسئله سی اولا بیلمز !
بونا اوخشار منظره، تخریباتچی مقصد ایله تورک لری تحقیر ائدیب حاشیه یه ایتن لر ظاهراً بعضاً تورک لردیرلرکی تبارلارینی آشاغیلاییب اؤزلرینه گل ووراندا « من کی شخصاً بیر تورکم» جمله سی ایله تبلیغاتلارینا مشروعیت آختارارلار کی حاکیم میللت دن ایمتیاز آلا بیلسینلر. بوردا دا دقیقاً همین مسئله دیر. قادینلارین قادینا قارشی بئله پروقراملاردا و فیلم لرده اویناتیلماسی گرکلی و ایناندیریجیدیر.
-کیلیشه موذیانه گولوش و طنز آدی آلتیندا یارانیر. بئله لیکله اعتراضا گلدیگیمیزده: «جانم بو شوخلوق دو سن ظرفیتین آتیر و اصلاً گوناه سنده دیر کی شوخلوق دان آنلامیرسان… » ، دئیب اعتیراض ائدن لره حتی «تحممول سوز و بی ذوق » دامغا سی ایله حمله ائدرلر و اونلارا آرتیقلیق گلیب سوسدورارلار. گنه تورک لره ده «تورک …. » دئدیک ده اعتیراض قارشیسیندا حتی تلوزیوندا اوشاق پروقراملاریندا توهینلره خیابان‌لاردا اعتیراض لارا « اصلاً توهین یوخدو بلکه تورک لر ظرفیت سیز و عصبی اینسانلاردیر » سؤزلری ، هویت لرین ایتیرمیش تورکلره دئدیتدیریرلر. (میثال اوچون فیتیله جریانین دا بی بی سی، بو رول دا عباس جوادی نی میدانا گتیرمیشدی )
بو ویدئولاردا و حیکایه لرده و جوک لاردا، حتی بیر نمونه ده اولسا آشاغیلانان و تحقیر اولان جینس لرین نوبتی دگیشمیر و آنجاق قادین جینسی «شوعورسوز» دامغا ایله قلمه وئریلیر. پس مسئله تصادفی دئییل و اصلا ساده جه گولمک اوچون دئییل. یوخسا هر ایکیسینین نوبت ایله احمق روللارینا گیرمه لری داها دا گولمه لی اولاردی نه اینکی تکجه قادینین احمق قالماسی.
پسیکولوژیک تخریبات تاثیرلری:
۱-مئدیانین و حتی سوسیال مئدیانین گوجونو بیلدیگمیزده ، او دا بو کیلیشه لری گولوش ساندویچی ایچینده مرتب یایماغدا اولان و ویدئولارا باخان عالیه عضولرینین شماتتینه قالیب و «گیج» دامغاسی مرزینده اؤزلرین حس ائدن قوربانی (اگر فرد دیر) و قوربانلار (اگر جمع دیر ) ، هم دانیشیغدا هم داورانیشدا ایکی قات و گرکسیز حساس اولمالی دیرلار کی بو ویدئولاردا قادین رولوندا شخصیتین لقبی اونلارا وئریلمه سین. بو استرس و اضطرابی آرتیرار.
۲.یاواش یاواش قوربانی ویا قوربانلار دامغادان یاخا قورتارماق اوچون حتی باشقالاریندان گوجلو بونلارا گولمگه باشلاییرلار.. «باخ! من ناراحت اولمورام چون منی توصیف ائتمیر. باشقا قادینلاری دئییر منی یوخ. منده سیز کیشیلر کیمینم و احمق دئییلم. ». بونو هویت سیزلشمیش تورکلرده ده کی جوک تورک …ائشیدنده هامی دان چوخ‌گولرلر بیر مودافعه مکانیزمی کیمی گؤره بیلریک. «من اونلاردان دئییلم و منیم ظرفیتیم وار و عصبانی دئییلم».
۳.زامان کئچدیکجه آرتیق گوونی سارسمیش قوربانی یا قوربانلار حقیقتاَ اینانار کی بی عورضه و ایشه یاراماز بیر وارلیق یا دا وارلیقلارا دؤنوشورلر. اؤزونه گوون یا اعتمادی آلینمیش شخص، نه اؤز حق و حوقوقونو، نه اؤز دئدیکلرینی مودافیعه ائده بیلر و نه ده ائتدیکلریندن امین اولا بیلر. حاکم شخص یا میللتی، دوغوردان دا اؤزونو اوندان گوجلو و عاقیللی بیلر. بئله لیکله تهلوکه سیز بیر قول ویاخود برده اولار کی هئچ بیر اعتراضا عورضه و جسارتی قالماز.
هدف یئرینه بئلجه یئتیشمیش اولار.
بو انگل لر و ویروسلارلا تحریم و کسکین تنقید لرله اعتیراض و موباریزه آپارمالییق.
بو تکجه جنسیت لرآراسی تبعیض و تحقیرلره یوخ، همده میللت لر آراسی و یا باشقا فرقلی اینسان قروپلاری آراسیندا « کنترل و مدیریت تئکنیکلری» بو ویدئو کیمی محصوللاردا، حقارت دولو محتوا ایله قاباغا آپاران پسیکوپات، خسته، اقتدارطلب شخصلر و گوجلر‌ه شاهید اولدوق. بونلارین دوردورولماسی اوچون در حال قارشی قویوب و بو «طنز» لرین آرخاسیندا یاتان چوخ سخیف و آلچاق هدفلری ایفشا ائتمگه چالیشمالییق.
