داود شیری تبریز اینقیلاب محکمه‌‌سینه چاغیریلیب
تورک مدنی فعال داود شیری محکمه حاکیميتی‌نین ثنا سیستمی واسطه‌‌‌سیله آلدیغی بیلدیریش اساسیندا ۱۶ تیر ۱۴۰۳-ده تبریز اینقیلاب محکمه‌‌سی‌نین ایکینجی شؤبه‌سینده اولمالیدیر.
آذربایجانلی حوقوق‌چو سینا یوسفی ایکس حسابیندا بو آذربایجانلی فعالین چاغیریش ورقه‌سینی پایلاشارارق بو مدنی فعالین تبریز اینقیلاب محکمه‌‌سی‌نین ایکینجی شؤبه‌سینه چاغیریلدیغینی اعلان ائدیب.
ثنا سیستمی واسطه‌‌‌سیله جناب شیری‌یه وئریلن بیلدیریشده، “ایسلام جمهورییتینه قارشی تبلیغات”، “توپلاشماق و داخیلی/خاریجی تهلوکه‌‌‌سیزلییه قارشی جینایت تؤرتمک اوچون ال بیر اولماغا تشبوث”، “اؤلکه‌نین موخالیفت قروپلارینا عضولوک (بؤلوجو قروپلارا عضولوک) ” اتهاملارینا یئتیرمک اوچون بو مدنی فعالدان تبریز اینقیلاب محکمه‌‌سی‌نین ایکینجی شؤبه‌سینده اولماسی ایسته‌نیلیب.
بوندان اؤنجه تبریزین ایکینجی جینایت محکمه‌‌سی‌نین ۱۲۰-جی شؤبه‌سی داود شیری، جواد احمدزاده، حسین امانی نادارلی و علیرضا صبری، آدلی دؤرد تورک مدنی فعالین پرونده‌سینی صلاحیتیندن کنار اولدوغونو اعلان ائده‌رک، بو فعاللارین پرونده‌سینی تبریز اینقیلاب محکمه‌‌سینه وئرمیشدی.
داود شیری، حسین امانی، جواد احمدزاده و علیرضا صبری، ۲۸ اردیبهشت ۱۴۰۲-ده گوونلیک گوجلری طرفیندن ساخلانیلمیش و بیر آیدان سونرا محکمه‌‌‌یه قدر مووقتی اولاراق گیروو قارشیلیغیندا سربست بوراخیلمیشدیر.
