دؤرد تورک مدنی فعالین پرونده‌سی تبریز اینقیلاب محکمه‌‌سینه وئریلیب

 تبریزین ایکینجی جینایت محکمه‌‌سی‌نین ۱۲۰-جی شؤبه‌سی داود شیری، جواد احمدزاده، حسین امانی نادارلی و علیرضا صبری، آدلی دؤرد تورک مدنی فعالین پرونده‌سینی صلاحیتیندن کنار اولدوغونو اعلان ائده‌رک، بو فعاللارین پرونده‌سینی تبریز اینقیلاب محکمه‌‌سینه وئریب.

بو فعاللارا قارشی اتهاملار “ایسلام جمهورییتینه قارشی تبلیغات”، “توپلاشماق و داخیلی/خاریجی تهلوکه‌‌‌سیزلییه قارشی جینایت تؤرتمک اوچون ال بیر اولماغا تشبوث”، “اؤلکه‌نین موخالیفت قروپلارینا عضولوک (بؤلوجو قروپلارا عضولوک) ” و “شوکر توتماق” اولاراق بیلدیریلیب و تبریزین ایکینجی جینایت محکمه‌‌سی‌نین ۱۲۰-جی شؤبه‌سی، پرونده‌یه باخماق اوچون صلاحیتیندن کنار اولدوغونو اعلان ائده‌رک، بو فعاللارین پرونده‌سینی تبریز اینقیلاب محکمه‌‌سینه وئریب.

آیریجا تبریز شهری‌نین بیر سیرا مدنی فعاللاری بو فعاللارین تصویری ایله بزه‌دیلمیش کؤینکلر گئیینه‌رک تبریز شهری‌نین بازاریندا گزیبلر.

داود شیری، حسین امانی، جواد احمدزاده و علیرضا صبری  ۲۸ اردیبهشت ۱۴۰۲-ده گوونلیک گوجلری طرفیندن حبس ائدیلمیش و بیر آیدان سونرا گیروو قارشیلیغیندا محکمه‌‌یه قدر مووقتی اولاراق سربست بوراخیلمیشدیلار.