خوزیستاندا عرب مدنی فعاللارینا قارشی حبس دالغاسی
خوزیستانداکی یئرلی منبع‌لر، خوزیستان ایالتینده دشت‌آزادگانلی وطنداش زینب سواری‌نین توتولدوغونو بیلدیریرلر.
زینب سواری، بو شهرین سئل قوربانلارینا اجتماعی یاردیمین تشکیلی ایله مشغول اولان دشت‌آزادگان شهریندن اولان بیر مدنی فعال و موعلیمدیر.
بیلگیلی بیر منبع‌یه گؤره، خانیم سواری بو گون، ۲۱ آذر ۲۰۲۰-جی ایلده قارداشی “حمزه سواری” و کیچیک باجیسی ایله بیرلیکده حبس اولوندو.
سون گونلرده خوزیستاندا مدنی ساحه‌‌‌ده فعال اولان قادینلارین حبس ائدیلمه‌سی‌نین یئنی بیر دالغاسی باشلادی و بو ایل ۱۰ آذردن بو یانا، خوزیستاندا ان آز دؤرد عرب مدنی فعالی‌نین گوونلیک گوجلری طرفیندن توتولاراق بیلینمه‌ین یئرلره آپاریلدیغی باره‌ده مئدیادا خبرلر یاییملاندی.
۱۹ آذر ۲۰۲۰-جی ایل چارشنبه آخشامی، ماهشهرین چمران شهرینده یاشایان بیر مئدیا فعالی “فاطمه تمیمی” شهرین اطلاعات ایداره‌سی‌نین مامورلاری طرفیندن توتولدو.
ائرته‌سی گون، ۲۰ آذر جومه آخشامی، فاتئمئه تمیمی‌نین دوستو و همکاری اولان مریم عامری کی عینی زاماندا خوزیستاندا عربلرین کولتورونو قئید ائتمه‌یه چالیشیر توتولدو و بیلینمه‌ین یئره کؤچورولدو.
شادگان‌دا عرب وطنداشلاردان ایکی قارداش بیر باجیلاری ایله بیرلیکده ۱۳۹۹-جو ایل آذر آیینین بیرینجی یاریسیندا اینقیلاب کئشیکچیلری اطلاعاتی طرفیندن توتولاراق بیلینمه‌ین بیر یئره کؤچورولدولر.
ازهار آلبوغبيش و ایکی قارداشی رضا آلبوغبيش و عباس آلبوغبيش، هر اوچو ۲۰ یاشیندان کیچیکدیرلر و آتالاری‌نین ائوینده توتولوبلار.
توتولانلارین هئچ بیری‌نین اتهاملاری و حبس سببلری باره‌ده خبر وئریلمه‌ییب، آنجاق خوزیستانداکی اینسان حاقلاری فعاللاری طرفیندن آیدین و دفعه‌‌لرله وورغولانان شئی، فعالیتلری‌نین مدنی اولماسیدیر.
