حمید پورولی و جلال دهقانی‌نین محکمه‌‌سی کئچیریلیب
تورک مدنی فعاللار حمید پورولی و جلال دهقانی دونن ۱۳ خرداد بازار گونو حاکم مختاری سرایین باشچیلیق ائتدیگی تبریز جزا محکمه‌‌سی‌نین ۱۰۸-جی شؤبه‌سینه گئدیب و اتهاملاری اوخوندوقدان سونرا اؤز ساوونمالارینی محکمه‌‌یه تقدیم ائدیبلر.
بو فعاللارا قارشی ایره‌لی سورولن اتهام، قانونسوز توپلاشمالارا قاتیلاراق توپلومسال دوزنی پوزماق اولاراق بیلدیریلیب کی بو ایکی فعال سؤزوگئدن اتهامی رد ائده‌رک اوز ساوونمالارینی وئریبلر.
۱۴۰۱-جی ایل ۲۵ تیرده بو آذربایجانلی تورک فعاللار داها ۵ نفرله بیرلیکده تبریزده اورمیه گؤلونون قصداً قورودولماسینا اعتراض ائدرکن ایران حؤکومتی‌نین گوونلیک گوجلری طرفیندن حبس ائدیلمیش ۲۸ شهریور گونو ده گیررو قارشیلیغیندا بو شهرین مرکزی حبس‌خاناسیندان سربست بوراخیلیبلار.
۲۵ تیر ۱۴۰۱-ده باش وئرن اعتراضلار زامانی اورمیه شهری و آذربایجانین باشقا شهرلری، او جومله‌‌‌دن تبریز، اردبیل، سولدوز، قوشاچای و… سیخ گوونلیک اورتامی‌نین شاهیدی اولموشدو کی، بو دا چوخلو تورک مدنی فعال و چئوره فعالی‌نین حبسی ایله سونوجلانمیشدی.
