تهران؛ قوجا قارغالار اویلاغی
چینار – ترلان قوش بیلیمی (پرنده شناسی) و قوش گؤزله‌می (پرنده نگری) درنه‌یی‌نین مدیری پایتخت‌ده قارغالارین ساییسی‌نین آرتماسینا توخوناراق دئییب: طبیعی دوشمنین اولماماسی و شهر اهالیسی طرفیندن قارغالارین یئمی‌نین تامین اولونماسی، اکولوژیک تبعاتی اولان قوجا قارغالارین ساییسینی آرتیر.
علیرضا هاشمی ایسنایا وئردییی مصاحبه‌ده تهران‌دا قارغالارین سایی‌نین آرتماسینا اشاره ائد‌رک علاوه ائدیب: مشاهده‌لره گؤره، قارغالارین سایی قاباقجالارا گؤره آرتیب و شهرده طبیعی دوشمنین اولماماسی، بو وضعيتین ان اؤنملی سبب‌لریندن بیری اولا بیلر. طبیعی شرایط‌ده، یئتیرنجه قیدالانمانین اولماماسی سببیندن قارغالارین فیزیکی گوجو آزالدیقدان سونرا ییرتیجی قوشلار اونلاری اوولاییر، آمما تهران‌دا قارغالارین دوشمنی یوخدور.
بو چئوره اوزمانی علاوه ائدیب: قوشلار طبیعت‌ده احتیاج دویدوقلاری قیدالاری تامین ائده بیلمه‌ینده ضعیف‌له‌ییب اؤلورلر. آمما تهران‌دا قارغا قوجالاندا اوچا بیلمسه بئله، زیبیلله قیدالانا بیلیر. اونا گؤره ده بیز پارک‌لاردا اوچا بیلمه‌ییب ساده‌جه یئریین آنجاق یا اینسانلار اونلاری بسله‌دییی اوچون، یا دا قارغالارین زیبیل و یئمک توللانتیلاریندان قیدالاندیقلارینا گؤره هله ده ساغ قالان قوجا قارغالار گؤروروک و بو، قوجا قارغالارین تهران و بوتون بؤیوک شهرلرده سایی‌نین آرتماسینا سبب اولور.
هاشمی‌یه گؤره، جانلی‌لارین ساییسینداکی هر هانسی بیر ده‌ییشیکلیک چئوره اوچون منفی نتیجه‌لری اولا بیلر. قارغا و دیگر حیوانلارین ساییسی آرتدیقجا، اکولوژیک دنگه پوزولور و باشقا جانلی‌لارین یاشامینی دا ائتکی‌له‌یر.
هاشمی بیر اؤرنک وئررک داوام ائتدی: تهران‌دا بولبوللرین سایی آرتارسا، اونلار سرچه کیمی قوشلارین یووالارینی و قیدا منبع‌لرینی اشغال ائتمه‌یه باشلایاجاقلار. بو وضعيت هئچ ده یاخشی اولمایاجاق. قارغالارین سایی آرتارسا، اونلار دیگر قوشلارین یووا یئرلرینی ضبط ائدیب و یا اونلارلا رقابت آپارا بیلرلر. بونا گؤره ده معين اؤلچودن آرتیق اولان هر شئی بوتون اکولوژی سیستمی ده‌يیشه‌جک.
هاشمی سونوندا دئدی: قوشلار و جانلی اورقانیزملر بو گونه قدر جانلی اورقانیزملره نه باش وئردییینی و گله‌جه‌ییمیزی قیمتلندیرمک اوچون چئوره‌ده یاخشی گؤستریجی‌لردیر. قوشلارا و جانلی‌لارا دقت یئتیرمه‌سک، قفیلدن یئرده قالاجاییق.
