تهران اینقیلاب محکمه‌‌سینده ایکی تورک مدنی فعالین محکمه‌سی کئچیریلیب
۵ خرداد ۱۴۰۳-ده تورک مدنی فعاللار آیدین(سلیمان) محمدی و سعید مینایی‌نین محکمه‌سی تهران اینقیلاب محکمه‌‌سی‌نین ۱۵-جی شؤبه‌سینده حاکم ابوالقاسم صلواتی‌نین باشقانلیغی ایله کئچیریلیب.
بو اوتورومدا جناب محمدی‌نین اتهامی، “داخیلی/خاریجی گوونلیگه قارشی جینایت تؤرتمک اوچون توپلاشماق و البیر اولماق”، “ایسلام جمهورییتی رژیمینه قارشی تبلیغات” و “رهبری تحقیر ائتمک” و جناب مینایی‌نین اتهامی ایسه “داخیلی/خاریجی گوونلیگه قارشی جینایت تؤرتمک اوچون توپلاشماق و البیر اولماق” اولاراق بیلدیریلیب و بو ایکی فعال قئید اولونان اتهاملاری رد ائده‌رک اؤزلرینی ساوونوبلار.
حوقوق فاکولته‌سی اؤیرنجیسی و تورک شاعر آیدین (سلیمان) محمدی ۱۶ بهمن ۱۴۰۲-ده اردبیل‌ده حبس ائدیلمیش و سونرا اوین تجرید‌خاناسی‌نین ۲۰۹-جو بندینه کؤچورولموشدور. او، بیر نئچه هفته حبسده قالدیقدان سونرا ۸۰۰ میلیون تومنلیک گیروو قارشیلیغیندا مووقتی اولاراق سزبست بوراخیلمیشدیر.
تورک مدنی فعال جناب مینایی ایه محکمهیه قدر ۸۰۰ میلیون تومنلیک گیروو ایله، ۲۳ اسفند ۱۴۰۲-جی ایل چارشنبه گونو اوین حبس‌خاناسیندان مووقتی اولاراق سربست بوراخیلمیشدیر.
۱۶، ۱۷ و ۱۸ بهمن ۱۴۰۲-ده آیدا صدیقی خراسانلو، فاطمه آتشی خیاوی، کرامت روحنواز، علیرضا شیرزاد کوچنقی، امیرعلی برادران، یاشار حسین زاده، لطفعلی جباری، سهیلا اصغری، مرتضی پروین جدا، ودود اسدی، سالار طاهر افشار، سعید جمال زاده، باقر حاجی زاده، آیاز سیف خواه، سعید مینایی، کمال نوری، آراز امان، طاهر نقوی، سعید دوستان، سلیمان (آیدین) محمدی، کرم مردانه مستعلی بیگلو و عبدالله واحدی اردبیل، خیاو «مشگین شهر»، رشت، اورمیه، بیناب، تبریز، اسلامشهر، کرج و آستارادا گوونلیک گوجلری طرفیندن هئچ بیر حؤکم اولمادان قانونسوز اولاراق ساخلانیلیب.
بو آنا قدر ودود اسدی، سالار طاهر افشار، آیدین محمدی، عبدالله واحدی، سعید مینایی و سعید دوستان محکمهیه قدر گیروو قارشیلیغیندا مووقتی اولاراق اوین حبس‌خاناسیندان آزاد ائدیلیبلر.
