تنقیدی خوطبه‌لره سون قویماسی اوچون گوونلیک قوروملاری مولوی عبدالحمیده تضییق گؤستریر
جوما آخشامی، ۱۵ دی‌ده سیستان و بلوچیستان خبرلرینی یاییملایان حال‌وش خبر سایتی بیلدیریب کی، زاهیدانین سونی جوما ایمامی مولوی عبدالحمیدین زاهیداندا تنقیدی جوما خوطبه‌‌‌لرینه سون قویماسی اوچون گوونلیک اورقانلاری‌نین جدی تضییقی آلتیندادیر.
حال‌وش-ین راپورونا گؤره، گوونلیک و حربی قوروملار مولوی عبدالحمیده تضییق ائده‌رک، اوندان بلوچیستاندا جوما اعتراضلارینا سون قویماسینی و تنقیدی خوطبه‌لری دایاندیرماسینی ایسته‌ییب.
بو راپوردا مولوی عبدالحمیدین گوونلیک اورقانلاری‌نین طلبینی رد ائتدیگی ده بیلدیریلیر.
عومومی اعتراضلار باشلایاندان زاهیدانین جوما ایمامی گوونلیک گوجلری‌نین گئنیش شکیلده باسقیلارینا و اعتراضچیلارین اؤلدورولمه‌سینه قارشی سرت و تنقیدی چیخیشلار ائدیر. مولوی عبدالحمید آیریجا ایران ایسلام جمهورییتی‌نین لیدری علی خامنه‌ای‌نی گؤستریجیلرین یاتیریلماسی و اؤلدورولمه‌سیندن سوروملو حساب ائدیب و ایراندا اولوسلارآراسی موشاهیده‌چیلرین ایشتیراکی ایله رفراندوم کئچیریلمه‌سینی ایسته‌ییب.
عومومی اعتراضلار باشلایاندان سونرا زاهیدان شهری‌نین اهالیسی هر جوما گونو مولوی عبدالحمیدین ایماملیغی ایله جوما نمازینا قاتیلدیقدان سونرا کوچه‌لره توپلاشاراق ایسلام جمهورییتی، علی خامنه‌ای، اینقیلاب کئشیکچیلری و بسیج علیهینه شوعارلار سسلندیریرلر.
آلینان بیلگیلره گؤره، جوما گونو، ۱۶ دی عرفه‌‌سینده، زاهیدانین قانلی جوم گونوندن اون دؤرد هفته سونرا زاهیدان شهری‌نین مکتبلرینده چوخلو سایدا حربی قوه‌لر و سیویل پولیسلر یئر‌لشدیریلیب.
سون بیر نئچه گونده گوونلیک گوجلری زاهیدان شهری‌نین چئشیدلی بؤلگه‌لرینده ان آزی “۱۱۳ بلوج وطنداشی و ۱۸ یاشیندان کیچیک اوشاغی” “زوراکیلیق و سلاح گوجو” ایله حبس ائدیب.
