تبریزده ساخلانیلان ۷ مدنی فعال باره‌ده هله ده بیلگی یوخدور
ایراندا آذربایجان سیاسی محبوسلاری‌نین ساوونماسی درنگی (آداپ) آیلیق راپوروندا بیر نئچه واخت اؤنجه تبریزده ساخلانیلان اینسان حاقلاری فعاللاری باره‌ده هله ده بیلگی وئریلمیدیگینی آچیقلاییب.
درنک آیریجا فرهاد حسینی‌نین عائله‌‌‌سینه ایستناداً بیلدیریب کی، حسینی اؤز ائوینده ۱۹ شهریورده زنجانین اینقیلاب کئشیکچیلری مامورلاری طرفیندن ساخلانیلیب.
زنجان آزاد بیلیم‌یوردونون یوکسک لیسانس اؤیرنجیسی اولان جناب حسینی زنجان ایالتی مئدیاسیندا، او جومله‌‌‌دن بایرام ژورنالیندا ژورنالیست اولاراق چالیشمیش، مدنی-اجتماعی ساحه‌‌‌ده مقاله‌لر یازمیشدیر.
فرهاد حسینی زنجانین مدنیت و ادبی مرکزلرینده ده فعالیت گؤسترمیش و بیر نئچه مدت زنجان ایمام مدنيت مرکزینده تورک دیلی و ادبياتی درسی دئمیشدیر.
آداپ «داوود شیری»، «علی بابایی»، «امیرحسین آقایی»، «محمدرضا موحد»، «آزار ابراهیم‌زاده» و «جواد سودبر» و «مهرداد قادری»نین تبریزده، مینا علیخانی‌نین ایسه زنجاندا ساخلاندیقلارینی بیلدیریب.
اونلار اورمیه گؤلونون حاکمیییت طرفیندن قصداً قورودولماسینا اعتراض آکسییالاری و ایراندا اعتراضلارین ایلدؤنوم ایله علاقه دار ساخلانیلیب. خانیم علیخانی ۲ گون حبسده قالاندان سونرا ۵۰ میلیون تومن گیروو قارشیلیغیندا سربست بوراخیلیب.
آنجاق ساخلانیلانلارین ۷ نفرین دورومو، او جومله‌‌‌دن ساخلانیلما سببی و هاردا ساخلانیلدیقلاری باره‌ده بیلگی یوخدور.
چئوره ساحه‌‌‌سینده اوزمانلارین فیکرینجه، اورمیه گؤلونون قوروماسی بو اراضی‌نین ۱۴ میلیوندان چوخ ساکینی‌نین حیاتینی تهلوکه آلتینا قویوب و بو اراضی ساکینلری‌نین مجبوری کؤچونه سبب اولاجاق. اکولوژی اوزمانلارین فیکرینجه، اورمیه گؤلو اطرافیندا توز و آکتیو دوز فیرتینالاری ۵۰۰ کیلومتره قدر مسافه‌‌نی قت ائده بیلر.
