تبریزده دیش عملیاتیندان سونرا حیاتینی ایتیرن قیزین عائله‌‌‌سینه بیلگی یایماق قاداغان ائدیلیب
تبریزده دیش عملیاتیندان سونرا دونیاسینی ديیشن ۱۲ یاشلی دریا دلکش آدلی قیزین عائله عضولری اونون اؤلومونو مئدیا ایله پایلاشماماق اوچون گوونلیک گوجلری طرفیندن تضییقلره معروض قالیب.
بازار ائرته‌سی، ۲۹ مرداد گونو “اعتماد” قزئتی خبر یاییب کی، دریا دلکش دیش عملیاتیندان سونرا اؤزونه گلمه‌ییب و خسته‌خانادان چیخاریلاراق ائوه آپاریلدیقدان سونرا دونیاسینی ديیشیب.
بو راپوردا قئید اولونوردو کی، قیزی‌نین اؤلوموندن اؤنجه عائله‌‌‌نین اصراری و دفعه‌‌لرله خواهشلرینه باخمایاراق، کلینیک یئتکیلیلری و طب ایشچیلری اونون اؤزونه گلمه‌مه‌سی مسئله‌‌سینی حل ائتمه‌ییبلر.
مئدیادا گئدن بیلگیلرده بو اوشاغین عملیات اولوندوغو یئرین “آدینه” کلینیکی اولدوغو، و یئتکیلیلرین اینقیلاب کئشیکچیلرینه باغلی اولدوغو گؤستریلیر.
عدليه سیستمینه باغلی میزان خبر آژانسی بازار ائرته‌سی گونو محکمه‌‌یه باشوورولدوغونو وتبریزده دیش کلینیکینده ۱۲ یاشلی قیزین اؤلوم سببی‌نین آراشدیریلماسینی خبر وئریب.
بو راپورا گؤره و دوغو آذربایجان ایالتی‌نین ساوجیسی محبوب علیلونون سؤزلرینه گؤره، مرحومون والیدئینلری‌نین شیکایتی بو یاخینلاردا ایالتین محکمه سیستمینده قئیده آلینیب: شیکایت عریضه‌سی وئریلدیکدن درحال سونرا بو پرونده‌یه باخیلماسی اوچون ضروری محکمه قرارلاری وئریلیب.
علیلونون سؤزلرینه گؤره، ایالت عدلی-طب حکیمی بو یئنی یئتمه‌نین اؤلوم سببینی بللی ائتمک اوچون لازیمی موعاینه و آنالیزلر آپاریب و بو موعاینه‌‌لرین سونوجلاری ایالت محکمه اورقانلارینا بیلگی وئریله‌جک.
بیلگیلی بیر قایناغین بیلدیردیگینه گؤره، قیزین عائله‌‌‌سی اونون پرونده‌سینی مئدیایا آچیقلاماماق اوچون تضییق آلتیندادیر.
بو ساحه‌‌‌ده بیلگیلی شخص اونو دا بیلدیریب کی، “آدینه” طب مرکزی‌نین یئتکیلیلری “طبی سندلری و بیلگیلری دییشدیریر” و اونون اؤلومونه حاق قازاندیرماق اوچون بو اوشاقدا داها اؤنجه‌دن خسته‌لیک اولدوغونو آچیقلاماق نيتینده‌دیرلر.
