تبریزده آخیر چرشنبه باش وئرن حادثه‌‌‌لر سونوجوندا ۱۸۳ نفر یارالانیب
شرقی آزربایجان اورژانسی‌نین سؤزچوسو دئییب: تبریزده آخیر چرشنبه‌‌ده باش وئرن حادثه‌‌‌لر سونوجوندا ۱۸۳ نفر یارالانیب و بو حادثه‌‌‌لرین سایی اؤنجه‌کی ایلله موقایسه‌‌ده یوزده ۴۳ آرتیب.
وحید شادی‌نیا دئییب: شرقی آزربایجان ایالتینده آخیر چرشنبه گونو باش وئرن حادثه‌‌‌لرده ۲۴۹ نفر یارالانیب، اونلاردان ۴۰ نفری خسته‌خانایا یئر‌لشدیریلیب.
شرقی آزربایجان ایالتی اورژانسی‌نین سؤزچوسو دئییب: یارالانانلارین ۵۴ فایزی ۱۸ یاشدان آشاغیدیر (مینیموم یاش ۴ و ماکسیموم یاش ۷۴).
او، تبریزده ۱۸۳ نفرین یارالانماسینا ایشاره ائده‌رک آرتیریب: هشترود شهرینده ۴ نفر، اهرده ۷ نفر، عجبشیرده ۳ نفر، میانا‌دا ۲ نفر، بونابدا ۵ نفر، مرندده ۶ نفر، ورزقاندا ۱ نفر، هادیشهرده ۴ نفر، اوسکودا ۶ نفر، ماراغادا ۱۵ نفر هریس‌ده ایکی، بوستاناباددا ایکی، آذرشهرده ایکی، چاراویماقدا دا بیر نفر یارالانیب.
شادی‌نیا داوام ائتدی: یارالیلارین یوزده ۵۰-سی یولدان کئچنلر و تاماشاچیلاردیر و آخیر چرشنبه گونو باش وئرن حادثه‌‌‌لرین سایی اؤنجه‌کی ایلله موقایسه‌‌ده یوزده ۴۳ آرتیب.
شرقی آزربایجان اورژانسی‌نین سؤزچوسو دئییب: آخیر چرشنبه گونو باش وئرن حادثه‌‌‌لر سونوجوندا ۱۱۸ نفر گؤزوندن خسارت آلیب، ۷ نفر ایسه عضولری کسیلیب.
او بیلدیریب: آخیر چرشنبه باش وئرمیش حادثه‌‌‌لر سونوجوندا ۸۰ نفر یانیق، ۳۸ نفر جیزیق، ۶ نفر ایسه سینیق خسارتلری آلیب.
