تبریز حبس‌خاناسیندا اولان مدنی فعال کریم اسماعیلزادهنین ساغلیق دورومو آغیردیر
۱۹ گوندور حبسده ساخلانیلان تورک مدنی فعال کریم اسماعیلزادهنین ساغلیق دورومونون آغیر اولماسینا باخمایاراق، اونون گیروو قارشیلیغیندا سربست بوراخیلماسی‌نین قارشیسی آلینیب.
یاخینلاری‌نین دئدیگینه گؤره، معده‌سینده پروبلئم اولان و بو ایل مردادین باشیندا معده‌سینده عملیات اولونان جناب اسماعیل‌زاده هله ده اففکتیو موعالیجه ایمکانیندان یارارلانا بیلمه‌ییب و موعالیجه اوچون خسته‌خانایا آپاریلماییب.
آیریجا بو آذربایجانلی ایدمانچی‌نین و مدنی فعالین درمانلارینی چاتدیرماق اوچون عائله‌‌‌نین تبریز مرکزی حبس‌خاناسینا چوخ‌سایلی گئتمه‌لری حبس‌خانا یئتکیلیلری‌نین مقاومتی سونراسی سونوجسوز قالیب.
بونونلا باغلی اولاراق آلمانییاداکی آذربایجانلی حوقوق‌شوناس و جناب اسماعیلزادهنین وکیلی سینا یوسفی تویتینده اعلان ائدیب: مووکیلیم کریم اسماعیلزادهنین اورمیه گؤلونون قورتاریلماسی کامپانییاسینا دستک وئردیگی اوچون ۲۰ گوندور تبریز مرکزی حبس‌خاناسیندا ساخلانیلیب.
تهدیدلر، چاغیریشلار، دؤیولمه‌لر و حبسلر کئچمیشی اولان کریم اسماعیل‌زاده ۲۵ مرداد ۱۴۰۲-جی ایلده استادیوما داخیل اولارکن گوونلیک ایشچیلری و موغان شهری‌نین مدنی فعاللاری عبدالله انصاری، مهدی نصیرزاده و ابراهیم رضایی ایله بیرلیکده اونون قارشیسینی آلاراق دؤیه‌رک حبس ائتدیلر.
