تئمییز محکمه‌‌سینده عباس لسانینین سورگون جزاسی آرتیریلیب
اردبیل ایالتی‌نین تئمییز محکمه‌‌سی‌نین بیرینجی شؤبه‌سی ایلکین محکمه‌‌ده عباس لسانی‌یه قارشی چیخاریلان سورگون قرارینی آرتیراراق، بو مدنی فعال و کئچمیش سیاسی محبوسو ایکی ایل ۸ آی مدتینه یزده سورگونه محکوم ائتدی.
ایران‌وایره چاتان خبرلره گؤره، بو تورک مدنی فعالین سیویل اطاعتسیزلیگیندن سونرا تئمییز محکمه‌‌سینده عباس لسانینین سورگون جزاسینی اوچده بیر آرتیریب.
عباس لسانی دؤرد ایل ایکی آیلیق حبسدن سونرا ۲ اسفند ۱۴۰۱-ده اردبیل زیندانیندان آزاد ائدیلدی. او سربست بوراخیلدیقدان درحال سونرا عدليه ایشچیلری اونو حبس ائده‌رک ایکی ایل مجبوری سورگون اوچون یزد شهرینه کؤچوردولر.
بونا باخمایاراق، عباس لسانی سورگون قرارینا عمل ائتمه‌یه‌جه‌یینی بیلدیره‌رک عینی گون یزددن اردبیله قاییتدی.
بوندان اؤنجه بیلگیلی بیر قایناق ایران‌وایره بیلدیرمیشدی کی، عباس لسانی سون ۲۰ ایلده قئیری-اینسانی شرایطده اوزون ایللر حبس‌خانادا قالماسی سببیندن بئل دیسکی و اورک خسته‌لیگیندن اذيت چکیر و حاضردا تبریزده حکیمی‌نین نظارتی آلتیندادیر.
بو، یزدله تبریز آراسینداکی مسافه‌‌نین اوزون اولماسی اونون خسته‌لیکلری سببیندن سیاحتینی قئیری-مومکون ائتمه‌سی ایله باغلیدیر. حبس‌خانادا ائتکیلی و کیفایت قدر حکیم خیدمتینه چیخیشین اولماماسی سببیندن سون ایللرده خسته‌لیگی ده آرتیب. بو سببدن جناب لسانی سیویل اطاعتسیزلیگی ائتمک و مجبوری یاشاییش امرینه تابع اولماماق قرارینا گلیب.
اؤتن آیلاردا عباس لسانینین سورگون امرینی یئرینه یئتیرمکدن ایمتینا ائتمه‌سیندن سونرا یوزلرله مدنی فعال و کئچمیش سیاسی محبوس اونون ائوینه گله‌رک سورگون قرارینا عمل ائتمه‌مکده اونون سیویل اطاعتسیزلیگینی دستکله‌ییبلر.
عباس لسانی اردبیللی شاعر، یازیچی و مدنی فعالدیر. سون ۲۰ ایلده فعالیتینه گؤره دفعه‌‌لرله حبس ائدیلیب و سورگونه محکوم ائدیلیب. اونون «اؤزگورلوک هارایی» آدلی کیتابی دا وار. بو کیتابدا جناب لسانینین مقاله‌لر، چیخیشلار، شعرلر، موصاحیبه‌لر و حبس‌خانادان گؤندردیگی مکتوبلار توپلانیب.
