بیرجند و اصفهان حبس‌خانالاریندا داها دؤرد محبوس اعدام ائدیلیب
ایران حبس‌خانالاریندا گئنیش یاییلمیش اعدام دالغاسی‌نین آردینجا، بیرجند و اصفهان حبس‌خانالاریندا سون ایکی گونده داها ۴ محبوس آسیلیب.
“حال وش” خبر سایتی‌نین یایدیغی بیلگیلره گؤره، بازار گونو، ۲۷ آبان سحر تئزدن آزی اوچ بلوچ محبوس بیرجند حبس‌خاناسیندا اعدام ائدیلیب.
حال‌وشین یازدیغینا گؤره، “نارکوتیک”له باغلی اتهاملارلا اعداما محکوم ائدیلن بو محبوسلارا سونونجو دفعه عائله‌‌‌لری ایله گؤروشه ایجازه وئریلمه‌ییب.
۲۶ آبان شنبه گونو اصفهان مرکزی حبس‌خاناسیندا “قصداً آدام اؤلدورمه” اتهامی ایله اعدام جزاسینا محکوم ائدیلمیش “سجاد کرمی” آدلی محبوسون اعدام حؤکمو ایجرا ائدیلیب.
“ایران اینسان حاقلاری تشکیلاتی‌نین یایدیغی بیلگیلره گؤره، سجاد کرمی لنجان شهریندن اولوب و ۴ ایل اؤنجه قتلده اتهام اولوناراق حبس ائدیلیب و قیصاصا محکوم ائدیلیب.
ایران حبس‌خانالاریندا اعدام حؤکملری‌نین ایجراسی سون آیلاردا شدتله‌نیب و یالنیز اؤتن چارشنبه گونو ۱۰ محبوس، او جومله‌‌‌دن بیر قادین، بیر افقانیستان وطنداشی و ایکی کورد وطنداش “نارکوتیک” و یا “قصداً آدام اؤلدورمه” اتهامی ایله قیصاص حؤکمو چیخاریلیب و کرج‌ده‌کی قزل‌حصار حبس‌خاناسیندا اعدام ائدیلیب.
ایران اینسان حاقلاری تشکیلاتی‌نین وئردیگی ایستاتیستیکایا اساساً، اؤتن ایل ایران حبس‌خانالاریندا ۲۲-سی قادین اولماقلا آزی ۸۳۴ نفر آسیلیب.
