ایشقالا قارشی ساواش میللی شعوورون یوکسلمه سی ایله سونوجلاندی

آزربایجان جمهوریتینین ارمنیستان ایشغالینا قارشی باشلادیغی ساواشدان  5 گون گئچدی. خبر هرگون یئنیلیین قوروماقدادیر. گئچن 30 ایل ایشقالین عرفه سینده ساواش بو سویه لره و حتی بو گئنیشلیک ده اولوب، ایره لیله مه میشدیر. گؤرونتولر بوگون آزربایجان دئولتی نین داها جیددی تشبوسوندن خبر وئریر. سوپر گوج لر و عین حالدا بین الخالق تشکیلات لار آردی آردینجا ساواشی دایاندیرما مئساژلاری وئریرلر.

بیرلشمیش میللت لرین آلدیغی قطعنامه لرین هامیسیندا ارمنستانی آزربایجان توپراقلاریندان گئری چکیلمه سی طلب ائدیرلر. مینسک قوروپو بو قطعنامه لری نظره آلاراق ارمنیستانین بو ایشقالینا سون قویما مقصدی ایله ایکی طرفله  موذاکیره و آنلاشمایا وارماغا چالیشما آدی ایله بو ساحه ده هئچ بیر ایره لیله مه یه و حتی طرف لر آراسی آکتیوجه موذاکیره آپارماغا بئله وارابیلمه میشدیر. مینسک قوروپو 30 ایل بویونجا عملده بو ایشقالین دوامینا سبب اولموشدور بئله. بو نه دن له، آزربایجان دا خالق اعتراضلاری ایشقالا سون قویماق اوچون، گوندن گونه آرتماقدا و آزربایجان حاکمیتین بو ساحه ده سیخینتییا قویماقدا ایدی. چون کو بو ایشقالین عرفه سینده باش وئرن جینایت لر و بیر میلیون اینسانین ائویندن دیدرگین دوشمه سی سؤز قونوسودو.

آزربایجانین طلب لرینین الده اولماماسی و اؤلکه نین یوزده 20 سی ارمنیستان ایشقالیندا دوام ائتمه سی، و خصوصیله ارمنیستانین تووز بؤلگه سینده آزربایجان حربی کوماندان مرکزینه سالدیریسی و آزربایجانین نفت بورولاریندا ایخلال یاراتما تشبوسو  آزربایجان ایقتیدارینین صبرینی داشیرمیشدیر و اؤلکه نی آزاد ائتمه آماجی ایله حربی حرکاتی باشلاماسینین فیتیله سینه اود وورموشدور. البته کی آزربایجانین 30 ایله گؤزلنتیسی، تام معنادا بو پروبلئمین باریش یولو ایله حل اولماسینا اوزون، همده چوخ اوزون بیر چابا حئساب ائتمک اولور. بللی اولدوغو کیمی 30 ایل بئله ایشقالی  صلح یولو ایله حل اولماسینا یاردیمجی اولابیلمه میشدیر.

آدین چکدییم تاریخه دایاناراق، آزربایجان ایقتیداری ایلهام علی ائو باشچیلیغیندا ایشقالا سون قویماق اوچون بو دفعه حربی واسیطه یه ال قویموش و ایدعالارینا گؤره بو ساواشی ایشقال بیته نه دک دوام ائده جک لریندن خبر وئرمیشدیر. ساواش البته کی مسئله نین چؤزومو اوچون بیرینجی سئچیم دئیل دیر، باریشجیل یوللار هر زامان تئست اولونمالیدیرلار. نئچه کی آزربایجان 30 ایل اونا زامان صرف ائتدی. آمما تاسوفله سونوج وئرمه دی.

ایشقالا قارشی ساواش یالنیز آزربایجان جمهوریتی نین سینیرلاریندا قالمادا. اگر سه بو ساواشین دایاندیرماسی اوچون دونیا لیدرلری دانیشیب دئدیلر، آمما ایران دا و خصوصی ایله گونئی آزربایجان دا خالق مئیدانلارا چیخدی، ارمنیستانین ایشقالچی سیاست لرینه اعتراض سس لر قالدیردی و دونن تبریزده گئنیش بیر تظاهرات گئچکلشدی (ویدئوسون آشاغیدا یاییرام) و “قاراباغ بیزیم دی بیزیم اولاجاق” شوعاری ایله آزربایجاندا  ایشقالا قارشی گئدن ساواشا اؤز دسته یینی وئردی.  آمما سؤز بورادا بیتمه دی.

آزربایجاندا ارمنیستانین ایشقالینا قارشی ساواش، ایران دا و گونئی آزربایجان دا تورک میللی- دئموکراتیک حرکاتینین وارلیغین گؤسترمک اوچون، گوجون نومایش ائتدیرمک اوچون اولوملو بیر فورصت یارالتدی. تورک خالقی ایسلام جمهوروسونون یاسیقلارینا رغمن کوچه لره گلدیلر و گئنیش بیر گؤستری سرگیله دیلر و “تورک دیلینده مدرسه/ اولمالیدیر هرکسه” اسلوقانی ایله حرکاتین ان بیرلشدیریجی شعارینی دیله گتیردیلر. دونن تبریزده کی تظاهرات 1385نجی ایلده خرداد اعتراضلارین یادا سالیردی.

گونئی آزربایجان نین فرقلی شهرلرینده تظاهرات و خصوصیله تبریز تظاهراتی تورک ملی حرکاتی اوچون یئنی بیر نفس چکمه فضای آچدی، میللی شعورون گئنیشمه سینه سبب اولدو و حرکاتین یولو بیر گوجلو اعتراض ایله هامارلاندی…

گنل ده آزربایجان جمهوریتینده ایشقالا قارشی ساواش، ایران سیاسی جغرافیاسیندا، خصوصن گونئی آزربایجان دا تورک میللی- دئموکراتیک حرکاتینین وارلیغینی تثبیت ائتدی، گئنیش بیر میئدانی حرکت له میللی شعورون یایلماسینا بیر زمین اولوشدوردو… ساواش هر نه قدر آرزولانماسادا، آمما تورک خالقینین ایران دا و گونئی آزربایجاندا ایره لیله مه سیندن به جیددی نه دن اولدو…
کاشکی هئچ زامان ساواش اولمویایدی، آمما نه یازیق کی بعضن قاچینیلماز اولور… تورک لر اوچون ایراندا آزربایجان دا گئدن ساواش بو قدر وئریملی و اولوملو ائتیگیسی  اولماسینی بلکه کیمسه اینانمازایدی…

20201002

یونس شاملی

تبریزده کی تظاهرات دان کلیپ