ایرشاد ناظری : فارس دیلینه ضرر گلمه‌مه‌سی اوچون پولیسدن ایستیفاده ائده‌جییک
رئیسی حؤکومتی‌نین ایرشاد ناظری محمد مهدی اسماعیلی فارس دیلی و ادبياتی‌نین قورونماسی ایله باغلی کئچیریلن توپلانتیدا بیلدیریب کی، بیلگی و مدنيت قوروجولوغو فارس دیلی‌نین قورونماسیندا ائتکیلی اولمازسا، اونلار فارس دیلی‌نین زده‌لنمه‌سی‌نین قارشیسینی آلماق اوچون پولیس قووه‌لریندن ایستیفاده ائده‌جکلر.
بازار ائرته‌سی، ۱۷ اسفند ۱۴۰۰-ده اسماعیلی آیریجا موسیسه‌‌لر اوچون فارسجا آدلارین سئچیمینده داها چوخ حساسلیق اولاجاغینی و بو ایشین ایرشاد ناظرلیگی‌نین گؤروینده اولدوغونو آچیقلادی.
ایسلامی ایرشاد ناظری آیریجا بیلدیریب کی، ایران توپلومونون بو گونلرده‌کی احتیاجلاریندان بیری فارس دیلی و ادبياتیندان ایستیفاده ائتمک اوچون خالق و یئتکیلیللرینی حساسلاشدیرماقدیر.
او آیریجا دئدی: فارس دیلینی قورویوب ساخلاماغین ان اؤنملی یوللاریندان بیری شهر و اصناف تابلولاریندا آدلارین ایشله‌دیلمه‌سی، ائله‌جه ده یئرلی اتومبیللر اوچون ایران آدلاریندان ایستیفاده مدنيتینی جدی شکیلده داوام ائتدیرمکدیر.
محمد مهدی اسماعیلی آیریجا دئییب کی، او، اؤزونه و همکارلارینا فارس دیلی‌نین قورونماسی ساحه‌‌‌سینده یاخشی نؤمره وئرمیر، چونکی اونلار یاخشی سونوجلار گؤرمک اوچون بو ساحه‌‌‌ده اؤز یاناشمالارینی تکمیل‌لشدیرمه‌لیدیرلر.
بو ایلین آذر آییندا تهران اماکن ایداره‌سی، ایرشاد ناظرلیگی‌نین بیلدیریشینه گؤره، تهرانین اصنافلاری اوچون تورک، کورد، لور و قوزئی دیللرینه عاید آدلارین سئچیلمه‌سی‌نین قاداغان ائدیلدیگینی آچیقلادی.
عینی زاماندا بعضی پولیس یئتکیلیلری مئدیایا بیلدیریبلر کی، تهراندا اصناف فارس دیلی دیشیندا آدلاردان ایستیفاده ائتمه‌مه‌لی و تیجارتلری اوچون یالنیز فارس آدلاریندان ایستیفاده ائتمه‌لیدیرلر.
آماکن آیریجا بیلدیریب کی، یالنیز باشقا دیللرده دانیشان شهرلرده بو دیللرده آدلار سئچه بیلرلر.
