ایران‌دا بنزینین اوچ فرقلی قیمت ایله ساتیلاجاق
ایلنا خبر آژانسی اعلان ائدیب کی، ایران ایسلام جمهورییتی حؤکومتی اوچ فرقلی قیمتی حیاتا کئچیره‌رک سهمیه دیشیندا لیتری سککیز مین تومن قیمته بِنزینی تداروک ائتمک نيتنده‌دیر.
بو راپورا گؤره، نطرده توتولان یارانه سهمیه‌سی و آزاد سهمیه‌سینه گؤره اتومبیل باشینا نظرده توتولان سهمیه‌دن چوخ توکتنلر اوچون ۸ مین تومنلیک بِنزین تکلیف ائدیله‌جک.
ایلنا اوچ مین تومنلیک بِنزین لیمیتینی آزالتماغی بِنزینی اوچ فرقلی قیمته چئویرمک یولوندا ایلک آددیم حساب ائدیب.
اینقیلاب کئشیکچیلرینه باغلی تسنیم خبر آژانسی بازار ائرته‌سی، ۲ بهمن گونو سهمیه یاناجاق کارتلاریندا آزاد آدلاندیریلان ۳ مین تومنلیک بِنزین سهمیه‌سی‌نین ۱۵۰ لیتردن ۱۰۰ لیتره ائندیریلدیگینی آچیقلاییب.
تسنیم آرتیریب کی، ۱۵۰۰ تومنلیک بِنزینی کارتدا ساخلاما واختی دا آلتی آیا و ماکسیموم ۳۶۰ لیتره ائندیریلیب.
داها اؤنجه بو ساخلاما اوچون سون تاریخ ۹ آی و ماکسیموم ۵۴۰ لیتره قدر ایدی.
ایسلام جمهورییتی یئتکیلیلری سون بیر آیدا بنزینین قیمتینده و یا سهمیه‌سینده هئچ بیر ديیشیکلیک اولمایاجاغینا دایر دفعه‌‌لرله سؤز وئرمیشدیلر.
ایلنا یازیسی‌نین داوامیندا بو قرارین حؤکومت طرفیندن “اؤنجه‌دن و رسمی خبردارلیق ائدیلمه‌دن” حیاتا کئچیریلدیگینی یازیب.
۱۳۹۸-جی ایلین آبان آییندا کئچیریلن اعتراض آکسییالاری بنزینین قیمتی‌نین یوزده ۲۰۰ آرتماسینا جاواب اولاراق باشلاییب، لاکین تئزلیکله حؤکومت قارشیتی بیر یؤن آلمیشدی.
رویترز خبر آژانسی‌نین وئردیگی بیلگیلره گؤره، ۹۸-جی ایلین آبانیندا اعتراضلارین یاتیریلماسی زامانی ایران ایسلام جمهورییتی‌نین گوونلیک گوجلری طرفیندن ۱۵۰۰-دن چوخ اینسان حیاتینی ایتیریب.
