ایراندا اورک خسته‌لری اوچون درمان قیتلیغی؛ ساغلیق ناظری درمان چاتیشمازلیغینی تکذیب ائدیب
چارشنبه آخشامی، ۳۰ آبان گونو ایران مئدیاسیندا یاییلان بیر خبرده، ایراندا اورک خسته‌لری اوچون حیاتی درمان دا داخیل اولماقلا بیر سیرا حبلرین تاپیلمادیغی آچیقلاندی.
ساغلیق ناظری بهرام عین‌اللهی ده ۱ آذر چارشنبه گونو، حؤکومتین ایداره هئیتی‌نین ایجلاسی زامانی بو خبرلری تکذیب ائدره‌ک ادعا ائدیب کی درمان دورومو کئچن ایلله موقایسه‌‌ده چوخ یاخشیدیر.
او، سود توزونون قیتلیغینی دا ۴۲۰۰ تومنلیک دولتی دلارین بو محصول اوچون آیریلماسی و قونشو اؤلکه‌لرله قیمت فرقی سببیندن قاچاق‌مالچیلیغین آرتماسی ایله علاقه‌‌‌لندیریب.
۱۸ آبان گونو رضوی خوراساندا یئرلشن داواخانالارداکی ۴۰۰-دن چوخ اجزاچی درمان قیتلیغینا اعتراض اولاراق مشهدده والیلیک بیناسی‌نین قارشیسینا توپلاشمیشدی.
بیر مدت اؤنجه مجلیسین ساغلاملیق و موعالیجه کمیسیونونون عضوو یحیی ابراهیمی داواخانالاردا ۳۰۰-دن چوخ درمانین چاتیشمادیغینی بیلدیرمیشدی و ساغلیق ناظرلیگی‌نین اعتناسیزلیغینا اعتراض ائتمیشدی.
کئچن ایل درمان و اجزاچیلیق بیرلیکلری و اصنافی و حتی ملت وکیللری دفعه‌‌لرله ایراندا استراتژیک درمان رئزرولری‌نین ناراحات‌ائدیجی آزالماسی ایله باغلی خبردارلیق ائتمیشدیلر
