ایراندا 200 نفرین اؤزل اوچاغی وار و بو اوچاقلارین قیمتی 40 ایله 100 میلیارد تومن آراسیندا ديیشیر
همشهری‌نین راپورونا گؤره، ایراندا هر ایل بو اؤزل اوچاقلارین صاحبلری‌نین لیستینه ۲۰ ایله ۳۰ نفر اکله‌نیر.
پیام کرج هاوا لیمانی، تهرانین دوغوسونداکی افلاک آسیا هاوا لیمانی و آبیکده‌کی آزادی هاوا لیمانی تهراندا اؤزل اوچاقلارین دایاناجاغی یئرلر سیراسیندادیر. بو اوچاقلارین آدی چکیلن هاوا لیمانلاریندا ساخلانماسی‌نین قیمتی آیدا تخمینا ۱۵ ایله ۲۰ میلیون تومندیر.
همشهری بو تیپ اوچاقلارین قیمتی باره‌ده یازیب کی، نؤعندن و ایمکانلاریندان آسیلی اولاراق ۲-۱۲میلیارد تومن آراسیندا ديیشیر. همشهری آرتیریب کی، بو رقملر اولترا یونگول پروانه‌لی اوچاقلار اوچوندور و ایکی نفرلیک شخصی اوچاقلارین قیمتی ۴۰ و ۸ نفرلیک اوچاقلارین قیمتی ۱۰۰ میلیارد تومندن یوخاریدیر.
همشمهری‌نین راپورونون داوامیندا بیلدیریلیر کی، ایراندا ان چوخ یاییلمیش اؤزل اوچاقلار ۱۴۰ لیترلیک سوپئر بِنزین چنی ایله ۲ مین کیلومتره قدر اوچان ۲ نفرلیک اولترا یونگول اوچاقلاردیر.
بو راپوردا بیلدیریلیر کی، ایراندا اولترا یونگول اوچاقلاری ایداره ائتمک اوچون اولوسلارآراسی ایزین آلماق اوچون ۹۰ ساعت تئوری و ۵۰ ساعت اوچاقلا اوچماق و اینگیلیس دیلینی بیلمک لازیمدیر و تخمین ائدیلیر کی، “تخمیناً ۱۵۰ میلیون تومنه” باشا گله‌جک.
همشهری‌نین موخبیری قئید ائدیب کی، اؤزل اوچاقلارین تهران و ایرانین بؤیوک شهرلری اوزرینده اوچوشو قاداغاندیر و شهرلرین کنارلاریندان کئچمه‌لیدیر.
#ایران_خبرلری #اؤزل_اوچاق
