اوکراینا اوچاغی قوربانلاری‌نین عائله‌‌‌سی محکمه ادعاسی اوچون “ایمام خمینی” هاوا لیمانینا توپلاشدی
۱۸ دی جوما آخشامی گونو، اینقیلاب کئشیکچیلری طرفیندن اوکراینا اوچاغی‌نین وورولماسی‌نین ایلدؤنومو گونو، فاجعه قوربانلاری‌نین عائله‌‌‌لری تهرانین ایمام خمینی هاوا لیمانینا توپلاشاراق محکمه‌‌یه موراجعت ائتدیلر.
هاوا لیمانی‌نین بیر حیصه‌‌‌سینده اؤلنلرین فوتولارینی و چیچکلر قویاراق توپلاشدیلار. یاییملانان ویدئولاردا، قوربانلارین بعضی عائله عضولری اونلار حاقیندا دانیشیر و بو پرونده حاققیندا محکمه‌‌یه موراجعت ائدیرلر.
بو فاجعه قوربانلاریندان بیری‌نین آتاسی‌نین ایمام خمینی هاوا لیمانیندا اوچاغین وورولماسینی قصداً تؤره‌دیلمیش جینایت کیمی قیمتلندیردیگی بیر ویدئو یاییملاندی: اؤولادلاریمیزین سون آددیملارینی آتدیقلاری یئره و اونلارا قارشی تؤره‌دیلن جینایتی محکوم ائتمیک اوچون گلدیک.
PS752 اوچوشو قوربانلاری‌نین عائله‌‌‌لری بیرلیگی‌نین تویییتر حِسابیندا یاییملانان خبره گؤره، اوکراینا اوچاغی قوربانلاری‌نین عائله عضولری داها سونرا شاهدشهرده‌کی قضا یئرینه گئتدیلر و بیر ایلدؤنومو مراسیمی تشکیل ائتدیلر.
اؤنجه گوونلیک گوجلری‌نین اونلارین قارشیسینی کسدیکلری، آنجاق عائله‌‌‌لرین چاباسی ایله یولون آچیلدیغی دئییلیر.
اوکراینا اوچاغی‌نین اینقیلاب کئشیکچیلری طرفیندن وورولماسی‌نین ایلدؤنومونده، تهران حربی ساوجیسی دا حادثه‌‌‌نین سببی‌نین اینقیلاب کئشیکچیلری ساوونما سیستمی کوماندیری‌نین قوزئی یؤنونو آشکارلاماقدا ائتدیگی سهوی بیلدیره‌رک سورغونون بیتدیگینی اعلان ائتدی.
تهران حربی ساوجیسی غلامعباس ترکی، فاجعه ایله علاقه دار یالنیز بیر نفرین حبس اولوندوغونو سؤیله‌دی.
