اوچ گوندور اورمیه ده هاوا حساس یاش قروپلاری اوچون ساغلیق سیزدیر
باتی آذربایجانین چئوه قوروما تشکیلاتی‌نین معاونی دئییب: اوچ گوندور اورمیه‌ده هاوانی چرکلندیرن ماده‌‌لرین غلظتی‌نین آرتماسی‌نین آردیندان هاوا، حساس قروپلار اوچون ساغلام دئییل.
سعید موسوی، داوام ائتدی: ایندیکی دوروم ایله باغلی دار اولاراق، اورک و یا آغ‌جییر خسته‌لیگی اولان اینسانلاردان، یاشلیلاردان و اوشاقلاردان آچیق هاوادا اوزون‌موددتلی و یا گرگین فعالیتلردن چکینمه‌لری خواهش اولونور، باشقا اینسانلار ایسه اوزون‌موددتلی آچیق هاوا فعالیتینی آزالتمالیدیرلار.
سون گونلرده آذربایجانین چئشیدلی شهرلرینده هاوا چرکلیلیگی یوخاری سویه‌لرده ایدی و بیر چوخ گون حساس یاش قروپلاری اوچون ساغلیقسیز اولموشدور.
بازار ائرته‌سی اورمیه‌ده ده اوخوللار توز نه‌دنی ایله تعطیل ائدیلمیشتیر.
چرکلنمه ایندکسی صیفیردان ۵۰ رقمینه قدر تمیز هاوا، ۵۰-دن ۱۰۰ ایندکسه قدر ساغلام هاوا، حساس قروپلار اوچون ۱۰۰-دن ۱۵۰ ایندکسه قدر ساغلیقسیز هاوادیر و آیریجا، ۱۵۰-دن ۲۰۰ ایندکسه قدر بوتون قروپلار اوچون هاوا ساغلیق‌سیزدیر.
#آذربایجان_خبرلری #هاوا_چرکلیلیگی
