اورمیه گؤلونون ساحه‌‌‌سی ۸۸ کیلومِتر مربع داها آزالیب
اورمیه گؤلونو جانلاندیرما قرارگاهی‌نین ایالت نوماینده‌‌سی فرهاد سرخوش، کئچن ایله گؤره گؤلون ساحه‌‌‌سی‌نین ۸۸ کیلومِتر آزالدیغینی اعلان ائتدی.
فرهاد سرخوش بو گؤلون سویونون اؤنجه‌کی ایلین عینی دؤورونه نیسبتاً ۱ میلیارد ۹۲ میلیون متر مکعب آزالدیغینی دا سؤیله‌دی.
بو ایالت مقامی‌نین بیلدیردیگینه گؤره، گؤلون ساحه‌‌‌سی حاضردا ۳ مین ۵۶۶ کیلومِتر مربع‌دیر، کئچن ایلین عینی آییندا ایسه ۳ مین ۷۴۳ کیلومِتر مربع ایدی و بو سببدن ۸۸ کیلومِتر مربع آزالیب.
او آرتیردی: حال حاضردا اورمیه گؤلونده ۴ میلیارد ۸۸ میلیون کیلومِتر مربع سو وار، کئچن ایلین عینی دؤورونه نیسبتاً ۱ میلیارد ۹۹ میلیون کیلومِتر مربع آزالما ایله اوزلشیریک.
اورمیه گؤلونده‌کی اراضیده و سویون حجمینده آزالما، مسووللارین اؤنجه‌لر اورمیه گؤلونون وضعيتی‌نین یاخشیلاشدیریلدیغینی اعلان ائدرکن باش وئریر.
اورمیه گؤلونون جانلانماسی، حسن روحانی‌نین جمهورباشقانلیغی سئچکیلرینده کامپانییا وعدلریندن بیری ایدی.
حسن روحانی حؤکومتی، گؤلو جانلاندیرماق و محو اولماسی‌نین قارشیسینی آلماق اوچون اورمیه گؤلونون جانلانماسی قرارگاهینی قوردو، لاکین ۱۳۹۲-جی ایلدن بری بو قرارگاهین یارادیلماسینا باخمایاراق اورمیه گؤلونون وضعيتی هر گون پیسلشدی.
ایران چئوره تهلوکه‌‌‌لری و داواملی گلیشمه درنگی‌نین عضوو حمیدرضا محبوب‌فر، ایرانین خبر آژانسلارینا قرارگاهین فعالیتینه گؤره : “سون ایللر اورمیه گؤلونون جانلانماسی داها چوخ مئدیانین های کویو ایدی، یاغیشین آزالماسی ایله گؤلون سویو دا آزالیب. “
اورمیه گؤلو ۱۳۵۴-جی ایلده دونیانین ان اؤنملی سولوق آلانلاریندان بیری کیمی قئیده آلینمیش و ۱۳۵۶-جی ایلده یونسکو طرفیندن قورونان اراضی‌لر لیستینه داخیل ائدیلمیشدیر.
اورمیه گؤلونون محو ائدیلمه‌سی و قوروماسی گئدیشاتی ۷۰-جی ایللرین سونلاریندا باشلادی و ۱۳۹۴-جو ایله قدر گؤل اراضیسی‌نین ۸۸ فایزینی ایتیردیگی نؤقطه‌‌‌یه چاتدی.
