اهوازداکی شیبان حبس‌خاناسیندا ساخلانیلان جابر صخراوی‌نین دورومونون آغیر اولدوغو بیلدیریلیب
ایران‌وایرین الده ائتدیگی بیلگیلره گؤره، اهواز عربلریندن اولان سیاسی محبوس “جابر صخراوی‌نین” ساغلیغی اهوازین شیبان حبس‌خاناسیندا پیسلشیب و تعجیلی موعالیجهیه احتیاج اولماسینا باخمایاراق، حبس‌خانا یئتکیلیلری اونو موعالیجهیه گؤندریلمه‌سینه مانع اولور.
بیلگیلی قایناقلار ایران‌وایره بیلدیریبلر کی، شیبان حبس‌خاناسینداکی جابر صخراوی‌نین ساغلیغی پیسلشیب و داواملی فیزیوتراپی‌یه احتیاج اولماسینا باخمایاراق، ام‌اس خسته‌لیگیندن اذيت چکن بو سیاسی محبوس حبس‌خانا یئتکیلیلری‌نین قراری ایله موعالیجه حوقوقوندان محروم ائدیلیب.
بو ایلین تیر آییندا بو سیاسی محبوس بئین سکته‌سی علامتلری ایله خسته‌خانایا آپاریلیب و اونون اون ایللیک جزاسی‌نین جمعی بیر ایلینین قالماسینا و فیزیکی دورومونا باخمایاراق یئنیدن شیبان حبس‌خاناسینا آپاریلیب.
اهواز عربلریندن اولان سیاسی محبوس جابر صخراوی ۱۳۹۳-جو ایلین فروردین آییندان بیر گون بئله مرخصی‌سی اولمادان حبسده ساخلانیلیر. او، النضال حرکتینه عضوو اولماقدا گوناهلاندیریلاراق ۱۲ ایل ۵ آی مدتینه آزادلیقدان محروم ائدیلیب. اؤنجه ده بو گنجله عینی حبس‌خانادا اولان بیلگیلی بیر قایناق ایران‌وایره بیلدیرمیشدی کی، حبسدن اؤنجه اونون ام‌اسی وار ایدی، لاکین نظارت آلتیندا ایدی و دیندیرمه زامانی شدتلی ایشگنجه‌لره گؤره ۱۰ ایل اؤنجه اهوازداکی کارون حبس‌خاناسینا گتیریلنده “بالاجا اوشاق کیمی دؤرد آیاق اوسته یئریردی” و آیاغا قالخا بیلمیردی.
