اهواز حبس‌خانالاریندا ۸ سیاسی محبوسون اعدام اولوناجاغی ایله باغلی ناراحاتلیق واردیر
“کارون” حوقوق-ساوونما تشکیلاتی‌نین وئردیگی بیلگیلره گؤره، “عباس دریس” نیزار معشور (مهشهر) قتلیامی اولایلارینا گؤره گؤره اعداما محکوم ائدیلن محبوسلاردان بیریدیر. او، ۱۳۹۸-جی ایلین آبان آییندا باش وئرمیش بو حادثه زامانی گوونلیک گوجلریندن بیرینی اؤلدورمکده اتهام اولونور. معشور همین دؤورده اساس اعتراض یئرلریندن بیری کیمی تانینیر.
۱۴۰۱-جی ایلین آبانیندا “ژینا (مهسا) امینی” عصیانی کیمی تانینان عوموم‌خالق اعتراضلاری زامانی حبس ائدیلن باشقا محبوس ایسه ایذه شهرینده سلاحدان ایستیفاده ایله اتهام اولونان مجاهد کورکوردور. ایسلام جمهورییتی‌نین عدليه اورقانلاری ۲۵ آبان ۱۴۰۱-ده ایذه‌ده باش وئرن سلاحلی چاتیشمانین سوروملوسونو مجاهد کورکورا نیسبت وئریب. “کیان پیرفلک” ده داخیل اولماقلا یئددی وطنداشین اؤلومونه سبب اولان بیر چاتیشما. بو اتهام کورکور و عائله‌‌‌سی طرفیندن رد ائدیلدی و اونون ایشگنجه آلتیندا اعتراف ائتمه‌یه مجبور ائدیلدیگینی بیلدیریلیب.
اعدام جزاسینا محکوم ائدیلن باشقا محبوسلار، «علی مجدم»، «معین خنفری»، «سالم موسوی»، «محمدرضا مجدم»، «عدنان موسوی» و «حبیب دریس» ده اعدام ریسکی ایله اوزلشن محبوسلار لیستینده‌دیر. بو شخصلر ۱۳۹۷-جی ایلین سونو و ۱۳۹۸-جی ایلین باشیندا چئشیدلی اتهاملارلا حبس ائدیلیب و اینقیلاب کئشیکچیلری تجرید‌خانالاریندا آیلارلا داوام ائدن ایشگنجه‌لردن سونرا اعدام جزاسینا محکوم ائدیلیبلر.
