«اندیشه نو» و «تک درخت» کتاب ساتیشی مرکزلرینی باغلادیلار! (1)

«اندیشه نو» و «تک درخت» کتاب ساتیشی مرکزلرینی باغلادیلار! (1)
اکبر آزاد

گئچن 20 آیدا دؤرد- بئش دفعه دن آرتیق «اندیشه نو انتشاراتی»-نین مدیری سایین یوسف قوسی(فرزانه) ایله گؤروشمه میشم:
بیر دفعه اورک خسته خاناسیندا قارشی- قارشییا گلیب، آیاق اوستو گؤروشدوک! من قوهوم-اقربانین بیرینی قلب عملیاتی اوچون خسته خانایا آپارمیشدیم. او دا اؤزو خسته خانایا گلمیشدی! اورگیندن شکایت ائدیردی!
بیردفعه ده ائشیتدیم همان خسته خانادا قلب عملیاتی ائدیبدیر! باشقا بیر دوست ایله خسته خانادا گؤروشونه گئتدیم! الحمدالله عملیات یاخشی اولموشدور! دورومو یاخشی ایدی! او دوستوموز ایسته دی موبایل ایله بیر شکیل چکه؛ راضی اولمادی! باشقا بیر دوست دا اوردا وار ایدی شکیل چکن دوستوموزا آجیقلاندی! و شکیل چکیلمه دی!
بیر دفعه ده سایین مهندس علیرضا صرافی¬نین رحمتلیک آناسی¬ نین یاس مجلسینده گؤروشدوک! باش ساغلیغی وئرمک اوچون گلمیشدیر! من ده بیر نئچه باشقا دوستلارلا بیرلیکده، باش ساغلیغی وئرمک اوچون یاس مجلسینه گئتمیشدیک! من گئدیب گؤروشدوم! کیف-احوال ائتدیک! و….
گئچن 20 آیدا بیرچوخ کتاب سئوه رلر «اندیشه نو انتشاراتینا» باش ووُدوقدا منی سایین یوسف قوسی(فرزانه) سوروشموشدولار! جناب یوسف قوسی همیشه قیسا اولاراق جاواب وئرمیشدیر:
«چوخدان دیر، داها بورا گلمیر!»
آنجاق هئچ زامان نییه سینی کیمسه یه دئمه میشدیر!
دئیه بیله رم گئچن 30 ایلده سایین یوسف قوسی(فرزانه)–دن سونرا، منجه «اندیشه نو انتشاراتینا» باش ووُران اولمامیشدیر! بو مدّتده «اندیشه نو انتشاراتی»-نین مدیری، سایین یوسف قوسی(فرزانه) همیشه سایغی ایله داورانمیشدیر! منه چوخلو محبت ائتمیشدیر! چاپ ائتدیگی بیر چوخ کتابلارین چاپا حاضرلانماسینی و ائدیت ائتمه سینی(آریدماسینی) منه تاپشیرمیشدیر! من ده باجاردیغیم قدر ایشلری یولا سالمیشدیم!
البته بونو دا دئمه لییم کی، گئچه ن 20 آیدا دا، تورکجه کتابلاری سئوه نلر آراسیندا مندن آز، «اندیشه نو انتشارتینا» باش ووُران اولمامیشدیر! چون بو مدت ده حتی بیر دفعه اورا باش ووُرمامیشام! یالنیز اوزاقدان- یاخیندان کیفینی–حالینی سوروشوردوم! بو باش ووُرمامانین سببی امنیتی قوه لره قاییدیر؛ چون امنیتی قوه لرین تحمیل ائتدیگی سیخینتیلار نتیجه سینده سایین یوسف قوسی مندن و باشقا بیر نئچه یازیچیدان ایسته میشدیر داها «اندیشه نو کتاب ساتیشی مرکزی»-نه باش ووُرماسینلار! من ایسه 20 آی اولار کی، «اندیشه نو انتشارتینا» باش وورمامیشام! البته یوخاریدا یازدیغیم کیمی بو فاصله ده بیر نئچه دؤنه مختلف یئرلرده اتفاق اوزره بیر-بیریمیزه راست گلیب گؤروشموشوک!
«اندیشه نو انتشاراتی» و «سایین یوسف قوسی» گئچمیش زامانلاردان بری، امنیتی قوه لر طرفیندن آز-چوخ سیخینتی آلتیندا ایدی! من یاخیندان بو سیخینتیلارا شاهد ایدیم! حتی دفعه لرله امنیتی و انتظامی قوه لر بو کتاب ساتیش مرکزینه گلمیشدیلر! بیر دفعه ده بوندان اؤنجه اوچ گونلوک بو کتاب ساتیش مرکزینی قاپاتمیشدیرلار!
بو سیخینتیلار 1397-جی ایلین خورداد آییندا داها سَرتلشمیشدیر! بیر گون نئچه نفر بو تورکجه ساتیش مرکزینه مراجعه ائدیب؛ اونو بت به بت گزیب آختارمیشدیلار! بیر نئچه بؤیوک قاردون یئشیکلره بیر چوخ کتابلار دولدوروب اؤزلری ایله آپارمیشدیلار!(داوامی اولاجاق) (بیرینجی حصه نین سونو)