اف‌بی‌آی طرفیندن آختاریلان آلتی ایرانلی هکر
اف‌بی‌آی چارشنبه گونلرینده اولدوغو کیمی آختاریشا وئریلن شخصلرین آدلارینی آچیقلادی و بو دفعه بیر سیرا سیبر جینایتلرده اتهام اولونانلارین هر آلتی نفریده ایرانلیدیلار. بو شخصلردن اوچو شهریور آییندا ماهواره و اوزای صنایع‌سی ایله باغلی بیلگیلری اوغورلاماق جهدینده گوناهلاندیریلدی، آنجاق باشقا اوچ نفرین آدلاری ایکی ایل اؤنجه‌کی و تانینمیش بیر پرونده ایله باغلانتیلیدیر: ایرانا گئتمیش بیر آمریکا اطلاعاتی مامورونون پرونده‌سی.
***
اف‌بی‌آی-ین ۱۷ دی ۱۳۹۹-جو ایل چارشنبه گونو وئردیگی اعلاندا آختاریلان آلتی ایرانلی‌نین آدلاری گؤرونور: «محمد پاریار»، «حسین پروار»، «بهزاد مصری»، «محمد بیاتی»، «محمدرضا اسپرغم» و «سعید پورکریم عربی» (اعرابی).
ایلک اوچ نفرین آدلاری ان آزی ایکی ایلدیر مئدیادا یئر آلیر و باشقا اوچ نفرین آدلاری بو ایلین شهریوریندن بری مانشئته چئوریلیبدیر.
آلتی نفر ده اینقیلاب کئشیکچیلری ایله ایشبیرلیگینده و کیملیکلری اوغورلاماقدا، عینی زاماندا آمریکا و دیگر اؤلکلرین بیلگی‌سایار شبکلرینه گیرمه‌یه جهد گؤسترمکده و بعضی حاللاردا اؤنملی بیلگیلری اوغورلاماقدا گوناهلاندیریلیر.
ماهواره صنایع‌سی بیلگیلری‌نین سیبر اوغورلوغو
سعید پورکریم عربی، محمدرضا اسپرغم و محمد بیاتی‌نین آدلاری ایلک دفعه اولاراق آمریکا عدليه ناظرلیگی‌نین ۲۷ شهریور ۱۳۹۹-جو ایل تاریخلی آچیقلاماسیندا یاییلمیشدی.
آچیقلامایا گؤره، ۲۰۱۵-جی ایلین ژوئیه‌سینده اینقیلاب کئشیکچیلری و ایسلام جمهوریییتی‌نین باشقا اطلاعات قوروملارینا باغلی اوچ نفرلیک قروپ آمریکا ماهواره و اوزای صنایع‌سی‌نین گیزلی تکنولوژیلری ایله باغلی بعضی بیلگیلری اوغورلادیلار.
اوچ نفر ماهواره و اوزای صنایع‌سینده چالیشان آمریکا وطنداشلاری‌نین ساختا کیملیکلری ایله اونلارین آدلارینا ایمیل یاراداراق ایشله‌ییبلر. داها سونرا بو ساختا ایمیللر واسطه‌‌‌سیله ساحه‌‌‌دکی اوزمانلار ایله یازیشاراق و سونوجدا بیلگی‌سایارلارینا جاسوس پروقرامی قوراشدیردیلار.
آمریکا عدليه ناظرلیگیندن وئریلن آچیقلامایا گؤره، اوچ نفرلیک قروپدا ۱۸۰۰ نفرلیک ماهواره و اوزای آکتیویستلرین حِسابی‌نین لیستی وار ایدی و اونلارلا باغلانتی قورماغا چالیشیردیلار. بو ۱۸۰۰ نفر آمریکا، اینگیلتره، استرالیا، اسرائیل و سنگاپور دا داخیل اولماقلا موختلیف اؤلکلرده یاشاییردی.
آمریکا عدليه ناظرلیگیندن وئریلن بیلگیلره گؤره، اوچ نفرلیک قروپا اینقیلاب کئشیکچیلری‌نین ۲۴ یاشلی عضوو سعید پورکریم عربی رهبرلیک ائدیب. هر اوچونون ده ایراندا ایقامتگاهی دئییلیب.
افق نو، هالیوود و طالب‌زاده‌نین همکاری اولموش کئچمیش آمریکا مامورو
اف‌بی‌ای-ین چارشنبه گونو یاییملادیغی آلتی نفرلیک لیستده ان آزی ایکی ایلدیر اولوسلاراراسی آختاریشا وئریلن اوچ آد گؤستریلیر: محمد پاریار، حسین پروار و بهزاد مصری.
بهزاد مصری آرالاریندا داها چوخ تانینیر و آدی اچ‌بی‌او هک حادثه‌‌‌سینده چکیلیر، لاکین بو اوچ شخصین آدلاری اصلینده «مونیکا ویت» پرونده‌سی ایله باغلیدیر.
مونیکا الفرید ویت ۱۹۹۷-۲۰۰۸-جی ایللرده آمریکا هاوا قوه‌لرینده قارشی اطلاعات مامورو گؤروینده چالیشیب. حربی هاوا قوه‌لریندن آیریلدیقدان سونرا آمریکا ساوونما ناظرلیگی ایله بعضی حاللاردا آنلاشما اساسیندا ایشله‌مه‌یه داوام ائتدی.
آمریکا عدليه ناظرلیگی‌نین ۲۴ بهمن ۱۳۹۷-جی ایل تاریخده یاییملادیغی آچیقلامادا، خانیم ویتین او زامان ۳۹ یاشیندا اولدوغو بیلدیریلدی.
بو اعلانا گؤره، مونیکا ویت، افق نو تشکیلاتی‌نین دعوتی ایله ۲۰۱۲-جی ایلین فوریه‌سینده (بهمن ۱۳۹۰) «سینما و هالیوودیسم» کنفرانسینا قاتیلماق اوچون ایرانا گئدیر و ایران گوونلیک قوروملاری اونونلا ایلیشگییه کئچیرلر.
او بیر ایل یاریم سونرا یئنیدن ایرانا گئدیر، لازیمی منزیل و تجهیزات تامین اولونور و او دا گیزلی بیلگیلری آچیقلاماغا باشلاییر.
گؤرونن او کی مونیکا ویت، او ایلدن بری ایراندا یاشاییر.
او دؤورده آمریکا ماليه و عدليه دپارتمانلاری طرفیندن وئریلمیش اعلانلاردا ایکی قوروم و ۱۰ ایرانلی‌نین آدی چکیلدی. ایکی قوروم افق نو تشکیلاتی نت پیگرد سماوات شرکتلری ایدی و محمّد پاریار، هوسئیین پروار و بئهزاد مسری ۱۰ عضولو لیسته ایچریسینده ایدیلر.
مونیکا ویتین آچیقلامالاری ایله آکتیو‌لشدیریلن و هک عملیاتلارینا، بیلگی‌سایارا گیرمه‌یه، بیلگیلری اوغورلاماغا و تخریبات تؤرتمه‌یه باشلایان شبکه یاراندی.
آرتیق آیدیندیر کی، افق نو-نون رهبری «نادر طالب‌زاده»نین اینقیلاب کئشیکچیلری‌نین ایرانداکی قودس گوجو ایله بیرلیکده کئچیردیگی کنفرانس و سمینارلارین اساس آماجلاریندان بیری، اؤزللیکله فایدالی بیلگیلره صاحب خاریجی شخصلری دعوت ائتمک و جلب ائتمکدیر.
سون ایللرده طالب‌زاده سینما و هالیوودیسم آدلی اوچ کنفرانس و افق نو آدلی یئددی کنفرانس کئچیرمیشدیر. البتده کی، بو کنفرانسلاردا ایشتیراک ائدن بعضی قوناقلار داها چوخ خبره لاییق ایدی. بئله گؤروشلرده کرملین دوشونورو و پوتین‌ین موعلیمی کیمی تانیتیلان «الکساندر دوگین» و الیور استونون اوغلو «شان استون».
آنجاق گؤرونن اودور کی، اساس ایستیفاده ائدیله‌جک قوناقلارین نه آدلاری دعوت لیستینه یازیلیردی نه ده مئدیانین دقت مرکزینه آلینیردی.
مونیکا ویتین آدی ۱۳۹۰ کنفرانسی‌نین قوناق لیستینده دئییل. البتده کی، ایرانا یئرلشدیکدن سونرا اونون آدینی اؤنجه «نرگس»، داها سونرا «فاطمه زهرا» اولاراق ديَیشدیریلمه‌سی ایله علاقه‌‌‌لی خبرلری و فوتولاری یاییملاندی.
بونونلا بیرلیکده، اف‌بی‌آی-ین یاییملادیغی لیستده، موختلیف جینایتلره گؤره آلتی ایرانلی آختاریلیر: محمد پاریار، حسین پروار، بهزاد مصری، محمد بیاتی، محمدرضا اسپرغم و سعید پورکریم عربی (اعرابی).
طالب‌زاده و افق نو و نت پیگرد سماوات ایله باغلی دئمک اولار کی، بوتون شخصلر آمریکا طرفیندن تحریم ائدیلیبلر.
