افشین نذیری حبس ائدیله‌رک اوین حبس‌خاناسینا کؤچورولوب
تورک فعال افشین نذیری گوونلیک گوجلری طرفیندن حبس ائدیله‌رک اوین حبس‌خاناسینا کؤچورولوب. عدليه و گوونلیک اورقانلاری تهراندا یاشایان بو فعالین عائله‌‌‌سینه بیلگی وئریبلر کی، اوغلونوزا ۱۰ گون مدتینه گؤروشلری قاداغان ائدیلیب و اوین حبس‌خاناسینا کؤچورولوب.
بو اکولوژی فعالین باجیسی اینستاگرامدا قارداشی حاقیندا پایلاشیم یاپاراق دئییب: تأسف کی، دونن قونشولاریمیزدان بیری‌نین واسطه‌‌‌سیله بیلدیک کی، سحر ساعت ۶-دا سیویل گئییملی ۵ نفر قارداشیمین ائوینه گیره‌رک اونو حبس ائدیبلر. قارداشیم بیزه زنگ ائدنه قدر اونون هارادا اولماسی باره‌ده بیلگیمیز یوخ ایدی. او اوین حبس‌خاناسیندان ساوجیلیغا آپاریلیب و یئنیدن اوین حبس‌خاناسینا کؤچورولوب. اون گون ایچینده گؤروشونه و علاقه ساخلاماسینا قاداغا قویولوب. اکولوژی فعالی افشین نذیری‌نین حبسی اورمیه گؤلونون قورودولماسینی اؤنله‌مک اوچون پایلاشیملار ائتدیگی اولوب.
سون گونلرده حؤکومتدن اورمیه گؤلونون قوروماسینی اؤنله‌مه‌یی ایسته‌ین مدنی فعاللارین حبسی آرتیب و آذربایجانین بیر چوخ شهرینده مدنی فعاللارا قارشی چاغریشلار، ساخلامالار و حبسلر آرتیب.
چئوره ساحه‌‌‌سینده اوزمانلارین فیکرینجه، اورمیه گؤلونون قوروماسی بو اراضی‌نین ۱۴ میلیوندان چوخ ساکینی‌نین حیاتینی تهلوکه آلتینا قویوب و بو اراضی ساکینلری‌نین مجبوری کؤچونه سبب اولاجاق. اکولوژی اوزمانلارین فیکرینجه، اورمیه گؤلو اطرافیندا توز و آکتیو دوز فیرتینالاری ۵۰۰ کیلومتره قدر مسافه‌‌نی قت ائده بیلر.
