اسرائیلین ایران‌داکی هدفلره هوجوموندان سونرا ایلان ماسک‌ین تپکیسی
تانینمیش میلیاردر و اسپیس ایکس‌ین صاحبی ایلان ماسک ۳۱ فروردین جوما گونو سحر ایرانا قارشی اسرائیله عاید ائدیلن هوجومدان بیر ساعت سونرا ایکس حسابیندا یازیب: بیز راکئتلری بیر-بیریمیزه یوخ، اوزایا آتمالیییق.
جناب ماسک آرتیردی: بلکه ده دونیا لیدرلری بیر-بیرلرینه ایمیل گؤندرمه‌لی و کیمین قالیب گله‌جه‌یینه خالقین قرار وئرمه‌سینه ایجازه وئرمه‌لیدیرلر. من بونو ساواشدان اوستون توتورام.
جوما گونو سحر اصفهان و تبریزده بیر نئچه پارتلاییش سسی ائشیدیلدیکدن سونرا اصفهان ایالتی‌نین اوردو کوماندانی خبر آژانسلارینا دئییب: اصفهان‌دا بو گون باش وئرن پارتلاییش هاوا هوجوموندان مودافیه ایله شوبهه‌لی جیسیملره آتش آچیلماسی ایله باغلی اولوب و هئچ بیر قضا و یا داغینتی ایله سونوجلانماییب.
بیر نئچه ساعت اؤنجهرویترز خبر آژانسی ایران‌داکی یوکسک روتبه‌لی یئتکیلیلره ایستناداً خبر وئرمیشدی کی، ایسلام جمهورییتی “درحال دؤیوشمک” نيتینده دئییل. بو خبر آژانسی بو شخصین آدینی و وظیفه‌‌‌سینی قئید ائتمه‌ییب، لاکین اونون شرحی اسرائیلین ایرانا هوجومونو اوستو اؤرتولو شکیلده تصدیق ائدیر.
سون بیر نئچه ساعت ایچینده ایرانین دؤولت خبر آژانسلاری اسرائیلین هوجومونو اؤنمسیز‌لشدیرمه‌یه چالیشیبلار. بو مئدیا دا اؤلکه ایچینده‌کی امین-آمانلیقدان، “نورمال” دورومدان خبر وئریر.
اسرائیلین هوجومونون بو اؤلکه‌نین ایرانین اؤز اراضیسینه سون زامانلار اینسانسیز هاوا آراجی و راکئت هوجوملارینا وئردیگی جاوابین سونو اولوب-اولماماسی و یا داوام ائدیب-ائتمه‌یه‌جیی هله‌لیک بللی دئییل. ایرانین اسرائیلین هوجومونا مومکون جاوابی دا آیدین دئییل.
