ابراهیم ساوالان محکمهیه قدر کفالت قراری ایله سربست بوراخیلیب
مشکین‌شهرده یاشایان آراشدیرماجی و ژورنالیست ابراهیم رشیدی (ساوالان) بو شهرین عومومی و اینقیلاب ساوجیلیغینا گئتدیکدن سونرا حاققیندا ساخلانیلما قراری وئریلدیکدن سونرا محکمهیه قدر کفالت قراری ایله سربست بوراخیلیب.
“ژورنالیستلیک جینایت دگیل“ین آلدیغی خبرلره گؤره، ابراهیم ساوالان دونن ۲۴ بهمن ۱۴۰-جو ایلده مشکین‌شهر اینقیلاب و عومومی ساوجیلیغینا گئتدیکدن سونرا ساوجیلیق موستنطیقی ولی صیامی کورعباسلو طرفیندن حاققیندا ساخلانیلما قراری وئریلدیکدن سونرا محکمهیه قدر ۵۰ میلیون تومنلیک کفالت قراری ایله سربست بوراخیلیب.
مشکین‌شهر ساوجیلیغی‌نین ایکینجی شؤبه‌سی‌نین موستنطیقی ۱۸ بهمن ۱۴۰۰-جو ایل بازار ائرته‌سی گونو ابراهیم رشیدی یالان یایماق اتهامی ایله بیر تاریخی حادثه ایله باغلی یایدیغی بیر یازی اوچون محکمهیه چاغیرمیشدی.
رشیدی اینستاگرام صفحه‌‌‌سینده اونون محکمهیه چاغیریلماسی‌نین سببلری باره‌ده یازمیشدی: تخمیناً بیر آی اؤنجه من آزربایجان و کیرمان نوماینده‌‌لری آراسیندا باش وئرمیش موباحیثه‌‌یه دقت یئتیره‌رک بیر یازی یازدیم و اورادا مشکین‌شهرین ایکی کندی‌نین کئچمیش حادثه‌‌‌لرینی میثال چکدیم. آللی کندی‌نین شورا عضولری بیر دیلکچه ایله ساوجیدان حاققیمدا شیکایتده بولونماسینی ایسته‌میشدیلر.
ابراهیم رشیدی ایکی کند آراسیندا سو اوستونده یارانان گرگینلیکله باغلی تاریخی حادثه‌‌‌نی نقل ائتدیگی یازیسینا ایستیناد ائدیر؛ آیت الله علی مشکینی‌نین موداخیله‌سی ایله موناقیشه طرفلریندن بیری‌نین سو حاقینی اله کئچیرمه‌سی حادثه‌‌‌سی.
ایندی اردبیل ایالتی‌نین آللی شهر شوراسی‌نین عضولری ابراهیم رشیدی‌نین خاطیره‌سینی بؤلگه عالیملری‌نین یوکسک قونومو و بؤیوک فقاهت مقامی و آیریجا دوشمنی سئویندیرن آدلاندیراراق بیر دیلکچه حاضیرلاییب و مشکین‌شهر ساوجیسیندان بو بؤلوجو و اهانت ائدیجی یازی‌نین عامللری‌نه قارشیلیق وئرمیی ایسته‌میشدیلر.
اfراهیم رشیدی تانینمیش آراشدیرماجی، ژورنالیست و مدنی فعالیدیر. او، آیدا بیر یاییملانان بایرام و یاییملانماسی قاداغان اولونان نوید آذربایجان درگی‌لری‌نین یاییم هئیتی‌نین عضوو، بلاگ یازاری و اولدوز اؤیرنجی ژورنالی‌نین باش مودیری و بولوت اؤیرنجی درگی‌سی‌نین باش یازاری اولوب.
ابراهیم ساوالان سون ۲۰ ایلده مدنی فعالیتلرینه گؤره دفعه‌‌لرله توتولوب، حبس ائدیلیب و ایشگنجه‌لره معروض قالیب.
#آذربایجان_خبرلری #ژورنالیستلیک_جینایت_دگیل #ابراهیم_رشیدی
