ابراهیم ساوالان : خالق آراسیندا دری و آتابای فیلملری
کئچن آیلاردا، خالق آراسیندا دری و آتابای فیلملرینی تاماشا ائتمه‌یه چوخ جیددی هوس یارانمیشدی. بو هوسله یاناشی آذربایجانین باشقا بیر مظلوملوغو، یانی بیر چوخ شهرلرده سینما بیناسی‌نین اولماماسی دا، گؤزه گلدی.
بئله‌لیکله بعضی شهرلرین عوموم اجتماعیاتی او شهرلرده سینما بیناسی‌نین یوخلوغو یا دا اولان بینالارین خارابا قالماسیندان گیلئی‌لنمه‌یه باشلادی. بیزده اونلارلا بیرگه، بو تریبوندا مئشکین سینماسی‌نین دورومونو قلمه آلدیق. او یازیدان بیر گون سونرا، خیاوین اسلامی شوراسی‌نین رئیسی، سینمایا گئدیب اورانین دورمونو اؤیرنیب خبر سیته‌لری ایله دانیشیغیندا «چوخلو شهرداشلارین طلبینه گؤره، تئزلیکله بیر مصوبه حاضیرلاییب و بو سینمانین نوقصانلارینی جبران ائتمه‌یه چالیشاجاغیق» دئمیشدی.
مئشکین سینماسی‌نین طالئعی، هر نه دن آرتیق یدالله صمدی‌نین فیلملری ایله دویونلنمیشدی. تقریبا اوتوز ایل اؤنجه بو سینما، دومرول و ساوالان فیلملری‌نین تاماشاچیلاری‌نی باغرینا باسمیشدی سونرا نئچه ایل اونودولوب سارای فیلمی ایکران اولدوغو آیلاردا اینانیلماز بیر استقبال‌لا قارشیلاشمیشدی. دومرول و ساوالان فیلملری فارسجا اولسالار دا، خالقین اؤز فرهنگیندن قایناییب قوپموشدو و سارای فیلمی ائله خالقین اؤز دوغما دیلینده ایدی.
سارایی سئللر آپاراندان بری، بو سینمانی دا یئللر آپاردی و کئچن ایگیرمی‌اوچ ایلده، کیمسه دؤنوب او بینانین اوزونه ده باخمادی و بو باخیب باخماماق، خالقین هانسی دیل و کیملیگی ترجیح وئریب وئرمه‌دیگی‌نی هر نه دن آیدین گؤستریردی.
دری و آتابای فیلملری‌نین ایکران خبرلری یاییلاندا، خالق «به بیزیم سینمامیز هانی، بیز فیلمه باخماق ایسته‌ییریک» دئیه بیر داها دیله گلدی. شهرلریمیزده فرهنگی مرکزلر، او جومله‌دن سینمالارین اولماماسی دیله- دیشه دوشدو و بو مسئله‌ده، ائله دری و آتابای فیلملری‌نین گتیریملریندن‌دیر.
هله‌لیک مئشکین سینماسی حاقدا او وعده وئریلمیش مصوبه‌نین هانسی مرحله‌ده اولدوغوندان خبرسیزیک آما خوشبختلیکله آسما کؤرپونون سینما سالونو، آتابای فیلمی‌نین مئشکینده ایکرانینا ایمکان یارادیب بو فیلمی گؤزله‌یین بیر چوخ اینسانلاری سئویندیردی. ایکی ساعاتلیق اولموش اولسا دا، اؤز دیلیمیزده فیلم ایزله‌ییب گلن گونلرین اومودونا، دادینی اونوتمایین لوطفن.
———-
@ibrahimsavalan
