ابراهیم ساوالان :او شانلی بیر ایلده، آذربایجان روزنامه‌سی بئله بیر بیلدیریش یایمیشدی
او شانلی بیر ایلده، آذربایجان روزنامه‌سی بئله بیر بیلدیریش یایمیشدی:
«آذربایجان خلق ادبیاتی- آذربایجان فولکلورونون ان گئنیش و زنگین ساحه‌سی اولان «خلق ادبیاتی» حیصّه‌سینی توپلاییب نشر ائتمک آرزوسیله، بو گوندن باشلایاراق آذربایجان رزونامه‌سینده بیر ستون آچیلیر. آذربایجانین بوتون منطقه‌لرینده اولان ماراقلی و هوسکارلاردان تمنّا ائدیلیر، آذربایجان فولکلورونون بو حیصّه‌سینی تکمیلی صورتده توپلانماسی اوچون یوخاریداکی مؤوضوعلره عایید معلوماتلارین دیقّتله توپلاییب آذربایجان روزنامه‌سی ایداره‌سینه گؤندرسینلر.»
بو بیلدیریشین آردیجا، فولکلور نمونه‌لری‌نین توپلانما ایشینده بیر چوخلاری تبریزدن و باشقا شهرلردن ایشتراک ائدیرلر و مین ایللر بویو اورک صاندیقلاریندا گیزلین ساخلانمیش بایاتیلار، مثللر و سایره فولکلور نمونه‌لری روزنامه‌یه یول تاپیر و آذربایجان روزنامه‌سی بیر نؤوع آذربایجان فولکلورو اورقانینا چئوریلیر.
او شانلی بیر ایلین قانلی فاجیعه‌سیندن سونرا، پهلوی رژیمی آذرین ایگیرمی‌آلتی‌سیندا تورکجه کیتاب و روزنامه‌لری مئیدانلاردا یاندیریب کول ائدیر. بیز بو دردی ائله همن ایللرده توپلانمیش، همن روزنامه‌لرده یانمیش بایاتیلار دیلی ایله اوخشاییریق:
منیم بو یانمیش گؤیلوم/ دردله قالانمیش گؤیلوم/ بیلدیر گونوم خوش کئچدی/ بو ایل تالانمیش گؤیلوم.
عزیزی‌یم، وار دردیم/ یوخ درمانیم، وار دردیم/ خار اکنلر گول دردی/ من گول اکدیم، خار دردیم.
عزیزیم یانا دردیم/ گلمز بیانا دردیم/ بیر درد بیلن اولسایدی/ دردیم بیان ائدردیم.
فلکی دیندیرئیدیم/ بیلمه‌زین بیلدیرئیدیم/ منه یازی یازاندا/ قلمین سیندیرئیدیم.
بی دردیم وار کاغاذیم/ سن ائله جار کاغاذیم/ یئتنده یار یانینا/ دیل آچ، یالوار کاغاذیم.
منیم آنام، اؤز آنام/ ایکی دولو گؤز، آنام/ یاد گلر یالان آغلار/ قوی آغلاسین اؤز آنام.
آرازی آییردیلار/ قومونان دویوردولار/ من سندن آیریلمازدیم/ ظولمونن آییردیلار.
قاشلارین میلدیر یاریم/ گولوشون گولدور یاریم/ آرامیزدا آراز وار/ قلبیمیز بیردیر یاریم.
آتیمیزی قوشالیم/ داغی- داشی آشالیم/ سن یاغمیر اول، من بولود/ یاغارکن قوووشالیم.
سو کیمی آخما یاریم/ یادلارا باخما یاریم/ یادلار منی یاندیریر/ سن باری یاخما یاریم.
عزیزیم گونه یاندیم/ گون چیخدی گونه یاندیم/ عالم بیر دفه یانسا/ من دؤنه- دؤنه یاندیم.
یاندیم، آللاهیم یاندیم/ یاتمیش ایدیم، اویاندیم/ داش اولسایدیم اریردیم/ تورپاق ایدیم دایاندیم.
———-
@ibrahimsavalan
